پاکستانی نوجوانوں کے لیے ناروے میں روزگار کے مواقع، تاریخی معاہدہ طے پا گیا

پاکستان اور ناروے کے درمیان بحری شعبے میں تعاون کی نئی راہ کھل گئی۔ پاکستانی ملاحوں (سی فیررز) کی تربیت اور سرٹیفیکیشن کے حوالے سے دونوں ممالک کے درمیان ایک اہم مفاہمتی یادداشت پر دستخط کر دیے گئے ہیں، جس کے بعد اب پاکستانی عملہ ناروے کے پرچم بردار جہازوں پر ملازمتیں حاصل کر سکے گا۔

یہ بھی پڑھیے جرمنی میں مقیم پاکستانیوں کے لیے بڑی خوشخبری، دونوں ملکوں کے درمیان اہم معاہدہ طے پاگیا

ناروے کے دارالحکومت اوسلو میں منعقدہ تقریب کے دوران ناروے میں پاکستانی سفارتخانے اور نارویجن میری ٹائم اتھارٹی کے حکام نے دستاویزات پر دستخط کیے۔ اس معاہدے کا بنیادی مقصد پاکستانی بحری عملے کی پیشہ ورانہ تربیت کو بین الاقوامی معیار کے مطابق تسلیم کرنا اور انہیں عالمی شپنگ مارکیٹ تک رسائی فراہم کرنا ہے۔

وفاقی وزیر بحری امور کا خیرمقدم

وفاقی وزیر بحری امور محمد جنید انوار چوہدری نے اس معاہدے کو پاکستان کے لیے ایک اہم سنگ میل قرار دیتے ہوئے اس کا بھرپور خیرمقدم کیا ہے۔ ان کا کہنا تھا کہ اس معاہدے سے نہ صرف دونوں ممالک کے درمیان میری ٹائم تعاون مضبوط ہوگا بلکہ پاکستانی نوجوانوں کے لیے بین الاقوامی سطح پر روزگار کے بہترین مواقع پیدا ہوں گے۔

پاکستانی ملاحوں کے لیے فوائد

وفاقی وزیر نے معاہدے کی اہمیت پر روشنی ڈالتے ہوئے کہا ہے کہ اب پاکستانی سی فیررز ناروے کی عالمی معیار کی شپنگ لائنز اور پرچم بردار جہازوں پر خدمات انجام دینے کے اہل ہوں گے۔ یہ معاہدہ پاکستانی افرادی قوت کو جدید بحری ٹیکنالوجی اور طریقہ کار کا عملی تجربہ حاصل کرنے میں مدد دے گا۔ پاکستانی تربیتی اداروں کی اسناد کو ناروے جیسے بڑے بحری ملک کی جانب سے تسلیم کیا جانا پاکستانی میری ٹائم سیکٹر کی ساکھ میں اضافہ کرے گا۔

یہ بھی پڑھیے پاکستان اور ناروے کا مختلف شعبوں میں تعاون مضبوط بنانے پر اتفاق

جنید انوار چوہدری نے مزید کہا ہے کہ حکومت پاکستان بحری تربیتی اداروں کے معیار کو مزید بہتر بنانے اور عالمی بحری کنونشنز پر سختی سے عملدرآمد کرنے کے لیے پُرعزم ہے۔ انہوں نے امید ظاہر کی کہ یہ معاہدہ عالمی شپنگ انڈسٹری میں پاکستان کا حصہ بڑھانے میں کلیدی کردار ادا کرے گا۔

معاشی ماہر سلمان نقوی کے مطابق اس معاہدے سے بیرون ملک ملازمتوں کے نتیجے میں کثیر زرِ مبادلہ پاکستان آئے گا، جو ملکی معیشت کے لیے خوش آئند ہے۔ ان کا ماننا ہے کہ ناروے کی مرچنٹ نیوی دنیا کی بڑی بحری قوتوں میں شمار ہوتی ہے، اور وہاں پاکستانی عملے کی شمولیت سے پاکستان کے بحری بیڑے اور افرادی قوت کو ایک نئی پہچان ملے گی۔