پاکستان نے ترکیہ، برازیل، اردن سمیت 10 ممالک کے ساتھ مل کر اسرائیل کی جانب سے ’گلوبل صمود فلوٹیلا‘ کو روکے جانے اور اس پر کارروائی کی شدید الفاظ میں مذمت کی ہے اور اسے بین الاقوامی قوانین کی خلاف ورزی قرار دیا ہے۔
جمعہ کی صبح جاری کیے گئے ایک مشترکہ بیان میں پاکستان، ترکیہ، برازیل، اردن، اسپین، ملائیشیا، بنگلہ دیش، کولمبیا، مالدیپ، جنوبی افریقہ اور لیبیا کے وزرائے خارجہ نے غزہ کی جانب جانے والے امدادی قافلے پر اسرائیلی کارروائی کو “حملہ” قرار دیتے ہوئے اس کی مذمت کی۔
یہ بھی پڑھیں:’فریڈم فلوٹیلا میڈلین نے اپنا مقصد حاصل کر لیا ‘
فلوٹیلا میں انسانی امداد اور مختلف ممالک کے سماجی کارکن شامل تھے، جو غزہ کے محاصرے کو توڑنے اور وہاں جاری انسانی بحران کی طرف عالمی توجہ دلانے کے لیے روانہ ہوا تھا۔ منتظمین کے مطابق یہ قافلہ بین الاقوامی پانیوں میں تھا جب اسے اسرائیلی فورسز نے روک لیا۔
مشترکہ بیان میں کہا گیا کہ یہ فلوٹیلا ایک پرامن اور شہری انسانی ہمدردی پر مبنی مشن تھا، جس کا مقصد غزہ میں پیدا ہونے والے انسانی بحران کو اجاگر کرنا تھا۔
🔊PR No.1️⃣1️⃣2️⃣/2️⃣0️⃣2️⃣6️⃣
Joint Statement by the Foreign Ministers of Pakistan, Bangladesh, Brazil, Colombia, Jordan, Libya, Malaysia, Maldives, South Africa, Spain and Turkiye Regarding the Israeli Assaults on the Global Sumud Flotilla, 30 April 2026
🔗⬇️ pic.twitter.com/C2lzmPvE2i— Ministry of Foreign Affairs – Pakistan (@ForeignOfficePk) April 30, 2026
بیان میں مزید کہا گیا کہ اسرائیل کی کارروائی اور کارکنوں کی حراست بین الاقوامی قانون اور انسانی قوانین کی کھلی خلاف ورزی ہے، جبکہ گرفتار افراد کی سلامتی پر بھی شدید تشویش ظاہر کی گئی ہے۔
وزرائے خارجہ نے مطالبہ کیا کہ تمام زیر حراست کارکنوں کو فوری طور پر رہا کیا جائے اور ان کی حفاظت کو یقینی بنایا جائے۔
دوسری جانب پاکستان کے نائب وزیر اعظم و وزیر خارجہ اسحاق ڈار نے بھی اس اقدام کی مذمت کرتے ہوئے کہا کہ انسانی امداد کو روکنا اور کارکنوں کو حراست میں لینا بین الاقوامی قوانین کی خلاف ورزی ہے۔
انہوں نے عالمی برادری سے مطالبہ کیا کہ وہ غزہ کی ناکہ بندی ختم کرائے، انسانی امداد کی بلا رکاوٹ فراہمی یقینی بنائے اور فلوٹیلا میں موجود تمام افراد کی فوری رہائی کے لیے کردار ادا کرے۔
پاکستان نے ایک بار پھر فلسطینی ریاست کی حمایت اور غزہ میں فوری جنگ بندی کا مطالبہ دہراتے ہوئے کہا ہے کہ شہریوں تک امداد کی فراہمی میں کسی قسم کی رکاوٹ ناقابل قبول ہے۔
