متحدہ عرب امارات میں بڑھتی ہوئی گرمی اور سفری اخراجات کے باعث مقامی رہائشیوں کے لیے ایک دن میں 4 بڑی انڈور سیاحتی اور ثقافتی جگہوں کی سیر پر مبنی دلچسپ اسٹے کیشن کا منصوبہ سامنے آیا ہے۔
خلیج ٹائمز کی رپورٹ کے مطابق یہ 24 گھنٹے کا سفر ابو ظہبی کے سعدیات آئی لینڈ پر محیط ہے، جہاں لوگ ایک ہی دن میں جدید ڈیجیٹل آرٹ، تاریخی عجائب گھر، اور عالمی ثقافتی ورثے سے بھرپور مقامات دیکھ سکتے ہیں، اور وہ بھی بغیر شدید گرمی کا سامنا کیے۔
یہ بھی پڑھیں:دبئی کا پرتعیش برج العرب ہوٹل 18 ماہ کے لیے بند کرنے کا فیصلہ، وجہ کیا بنی؟
اس منصوبے کے تحت پہلا پڑاؤ ’ٹیم لیب فینومینا ابو ظہبی‘ ہے، جہاں روشنی اور رنگوں سے بھرپور ڈیجیٹل آرٹ تجربہ کیا جا سکتا ہے۔ یہ جگہ مکمل طور پر انٹرایکٹو ہے، جہاں بچے اور بڑے دونوں آزادانہ طور پر تجربہ کر سکتے ہیں۔
دوسرا اسٹاپ ’نیشنل ہسٹری میوزیم ابو ظہبی‘ ہے، جہاں زمین کی تاریخ، قدیم انسانوں اور ڈائنوسارز سے متعلق نایاب نمونے رکھے گئے ہیں۔ یہاں لاکھوں سال پرانی باقیات اور خلا سے آنے والے شہابیوں کو بھی قریب سے دیکھا جا سکتا ہے۔
اس کے بعد ’لوور ابو ظہبی‘ کا دورہ شامل ہے، جہاں دنیا بھر کے مختلف ادوار اور تہذیبوں کے تقریباً 6 ہزار فن پارے نمائش کے لیے رکھے گئے ہیں۔ میوزیم کا گنبد روشنی کے منفرد اثر سے ’بارشِ نور‘ کا منظر پیش کرتا ہے۔
یہ بھی پڑھیں:صدر مملکت آصف زرداری نے ابو ظہبی کے ولی عہد شیخ خالد بن محمد بن زاید آل نہیان کو نشان پاکستان عطا کردیا
چوتھا اور آخری مقام ’زید نیشنل میوزیم‘ ہے، جس کی عمارت شاہین کے پروں سے متاثر ڈیزائن پر مشتمل ہے۔ یہاں متحدہ عرب امارات کی 3 لاکھ سال پرانی تاریخ اور شیخ زید بن سلطان النہیان سے متعلق اشیاء بھی رکھی گئی ہیں۔
خلیج ٹائمز کے مطابق اس پورے سفر کے لیے ایک خصوصی میوزیم پاس بھی دستیاب ہے جس کی قیمت 170 درہم ہے، جبکہ 18 سال سے کم عمر بچوں کے لیے داخلہ مفت ہے۔ یہ منصوبہ سیاحوں اور رہائشیوں کو ایک ہی دن میں ثقافت، تاریخ اور جدید آرٹ سے جوڑنے کا منفرد موقع فراہم کرتا ہے۔
