امریکا کی معروف فضائی کمپنی ڈیلٹا ایئر لائنز نے اپنی سروس پالیسی میں تبدیلی کرتے ہوئے مختصر فاصلے کی پروازوں پر مسافروں کے لیے مفت کھانے اور مشروبات کی فراہمی ختم کرنے کا اعلان کر دیا ہے۔
کمپنی کے مطابق یہ فیصلہ آپریشنل اخراجات میں کمی اور پروازوں کے دوران سروس کو مزید مؤثر بنانے کے لیے کیا گیا ہے۔
ڈیلٹا ایئر لائنز نے بتایا کہ وہ اپنے ان فلائٹ فوڈ اینڈ بیوریج سروس میں تبدیلیاں کر رہی ہے، جس کے تحت روزانہ کی بنیاد پر تقریباً 450 پروازوں، یعنی لگ بھگ 9 فیصد فلائٹس سے یہ سہولت ختم کی جا رہی ہے۔
یہ بھی پڑھیے ایئرلائنز نے کرائے آسمان پر پہنچا دیے، اب اندرون وبیرون ملک کرائے کیا ہوں گے؟
کمپنی کے ترجمان کے مطابق 19 مئی سے بورڈ پر مشروبات کی سروس میں تبدیلی کی جا رہی ہے تاکہ پورے نیٹ ورک میں مسافروں کو یکساں تجربہ فراہم کیا جا سکے۔
میڈیا رپورٹس کے مطابق رواں موسمِ گرما میں جو مسافر ڈیلٹا ایئر لائنز کی مختصر پروازیں کریں گے، انہیں کھانے یا مشروبات کی سہولت فراہم نہیں کی جائے گی۔
اٹلانٹا میں قائم اس ایئر لائن کے مطابق 349 میل یا اس سے کم فاصلے کی پروازوں پر مکمل طور پر کھانے اور مشروبات کی سروس بند کر دی جائے گی۔ ان روٹس میں لاس اینجلس سے سان فرانسسکو جیسے مقبول راستے بھی شامل ہیں۔
یہ بھی پڑھیے امریکن ایئرلائنز کے پائلٹ کی تنخواہ منظرِ عام پر، سوشل میڈیا پر ہلچل
تاہم 350 میل یا اس سے زیادہ فاصلے کی پروازوں پر ڈیلٹا کمفرٹ اور ڈیلٹا مین کیبن کے مسافروں کو مکمل کھانے اور مشروبات کی سہولت فراہم کی جاتی رہے گی، جو کمپنی کی تقریباً 14 فیصد روزانہ پروازوں پر مشتمل ہیں۔
ایئر لائن کا کہنا ہے کہ جن محدود پروازوں پر مشروبات کی سروس دستیاب نہیں ہوگی، وہاں بھی عملہ مسافروں کی خدمت اور رہنمائی کے لیے ہر وقت موجود رہے گا۔
البتہ ڈیلٹا فرسٹ کلاس کے مسافروں کے لیے تمام پروازوں پر مکمل سروس بدستور جاری رہے گی۔
