آزاد کشمیر کی وادی نیلم کے سیاحتی اور پہاڑی علاقے جاگراں بٹ گراں روڈ پر ایک افسوسناک ٹریفک حادثہ پیش آیا ہے جس میں ایک جیپ گہری کھائی میں جا گری۔ حادثے کے نتیجے میں خاتون سمیت 4 افراد جاں بحق جبکہ 2 افراد زخمی ہو گئے۔
یہ حادثہ ایک خطرناک موڑ پر پیش آیا جہاں سڑک تنگ اور دشوار گزار بتائی جاتی ہے۔
عینی شاہدین کے مطابق حادثے کے فوراً بعد مقامی افراد موقع پر پہنچ گئے اور امدادی کارروائیاں شروع کردیں۔
ریسکیو ٹیموں اور مقامی لوگوں نے مشترکہ طور پر زخمیوں اور جاں بحق افراد کو کھائی سے نکالنے کے لیے طویل کوششیں کیں۔ زخمیوں کو ابتدائی طبی امداد کے بعد قریبی طبی مرکز منتقل کردیا گیا جہاں ان کا علاج جاری ہے۔
انتظامیہ نے حادثے کی وجوہات جاننے کے لیے تحقیقات شروع کردی ہیں اور جاں بحق افراد کی شناخت سمیت دیگر تفصیلات جمع کی جا رہی ہیں۔
مقامی شہریوں نے حکومت سے مطالبہ کیا ہے کہ پہاڑی علاقوں میں سڑکوں کی حالت بہتر بنانے اور حفاظتی اقدامات کو یقینی بنانے کے لیے فوری اقدامات کیے جائیں تاکہ آئندہ ایسے افسوسناک حادثات سے بچا جا سکے۔
