وزیراعظم شہباز شریف نے 10 مئی کو ’معرکہ حق‘ کے نام سے منسوب کرنے کا اعلان کرتے ہوئے کہا ہے کہ یہ دن ہر سال بھرپور جوش و جذبے کے ساتھ منایا جائے گا۔
پاکستان مونومنٹ پر منعقدہ خصوصی تقریب سے خطاب کرتے ہوئے انہوں نے صدر مملکت، نائب وزیراعظم، فیلڈ مارشل، ایئر چیف، نیول چیف، وفاقی وزرا، کابینہ ارکان، مختلف ممالک کے سفرا اور شہدا کے اہل خانہ کو خراج تحسین پیش کیا اور کہاکہ اللہ تعالیٰ کا شکر ہے جس نے معرکہ حق کو عظیم کامیابی میں بدل دیا۔
وزیراعظم نے کہاکہ پہلگام واقعے کو بنیاد بنا کر بھارت نے پاکستان پر بے بنیاد الزامات عائد کیے، تاہم پاکستان نے صبر و تحمل کا مظاہرہ کیا اور عالمی سطح پر شفاف تحقیقات کی پیشکش کی۔
انہوں نے کہاکہ بزدل دشمن نے رات کے وقت مساجد اور شہری آبادی کو نشانہ بنا کر جنگ مسلط کی، جس کا مسلح افواج نے بھرپور جواب دیا۔ بھارت آج تک پہلگام واقعے سے متعلق کوئی ثبوت پیش نہیں کر سکا۔
شہباز شریف نے کہا کہ فیلڈ مارشل عاصم منیر کی قیادت قابلِ فخر ہے اور اسے سنہری حروف میں یاد رکھا جائے گا۔
انہوں نے کہا کہ پوری قوم اپنے سپہ سالار کو سلام پیش کرتی ہے۔ فضائیہ کی جرات اور میزائلوں کی درست نشانے بازی نے دشمن کو شدید نقصان پہنچایا، جس کے بعد 4 گھنٹوں کے اندر بھارت جنگ بندی کی درخواست پر مجبور ہوگیا۔
واضح رہے کہ معرکہ حق کا ایک سال مکمل ہونے پر پاکستان مونومنٹ پر ایک پروقار تقریب کا انعقاد کیا گیا، جس میں صدر مملکت آصف زردری، وزیراعظم شہباز شریف، فیلڈ مارشل عاصم منیر سمیت اہم شخصیات نے شرکت کی۔
