پینٹاگون کے اعدادوشمار: ایران کے خلاف جنگ میں امریکا نے کتنے ارب ڈالر صرف کردیے، کیا اسلحہ و گولہ بارود کا ذخیرہ کم پڑگیا؟

امریکی محکمہ دفاع (پینٹاگون) نے کانگریس کو بتایا ہے کہ ایران کے خلاف امریکی فوجی کارروائیوں پر اب تک تقریباً 29 ارب ڈالر کے اخراجات ہو چکے ہیں جو 2 ہفتے قبل بتائے گئے اندازے سے 4 ارب ڈالر زیادہ ہیں۔

یہ بھی پڑھیں: پینٹاگون نے 80 برس پرانے راز افشا کردیے، اڑن طشتریوں سے متعلق خفیہ فائلیں بالاخر جاری

یہ تازہ اعداد و شمار ایوانِ نمائندگان کی دفاعی ذیلی کمیٹی کے اجلاس میں پیش کیے گئے جس میں وزیر دفاع پیٹ ہیگستھ، جوائنٹ چیفس آف اسٹاف کے چیئرمین ڈین کین اور پینٹاگون کے کمپٹرولر جولز ہرست سوم نے شرکت کی۔

جولز ہرست نے قانون سازوں کو بتایا کہ اس وقت یہ لاگت 25 ارب ڈالر تھی لیکن ہماری ٹیم مسلسل نظرثانی کر رہی ہے اور اب اندازہ ہے کہ یہ تقریباً 29 ارب ڈالر تک پہنچ چکی ہے۔

انہوں نے کہا کہ یہ اضافہ فوجی سازوسامان کی مرمت اور تبدیلی کے اخراجات اور خطے میں امریکی افواج کی مجموعی آپریشنل لاگت میں اضافے کے باعث ہوا ہے۔

جنگی اخراجات پر سیاسی دباؤ

پینٹاگون نے اس سے قبل 29 اپریل کو بتایا تھا کہ 2 ماہ کی کارروائیوں میں اخراجات تقریباً 25 ارب ڈالر تھے۔

یہ اضافہ ایسے وقت میں سامنے آیا ہے جب صدر ڈونلڈ ٹرمپ کو آئندہ وسط مدتی انتخابات سے قبل سیاسی دباؤ کا سامنا ہے اور ڈیموکریٹس اس جنگی اخراجات کو اندرونی معاشی مسائل اور مہنگائی سے جوڑنے کی کوشش کر رہے ہیں۔

سماعت کے دوران قانون سازوں نے پینٹاگون حکام سے مطالبہ کیا کہ جنگی اخراجات کی مزید تفصیلی رپورٹ پیش کی جائے۔

وزیرِ دفاع پیٹ ہیگستھ نے جواب دیا کہ جب ضرورت ہوگی اور مناسب ہوگا، ہم دستیاب معلومات شیئر کریں گے۔

اسلحہ اور فوجی تیاری

اجلاس میں اس بات پر بھی تشویش ظاہر کی گئی کہ ایران کے ساتھ تنازع کے دوران امریکی میزائل اور گولہ بارود کے ذخائر میں نمایاں کمی ہوئی ہے۔

تاہم پیٹ ہیگستھ نے ان خدشات کو مسترد کرتے ہوئے کہا کہ گولہ بارود کے ذخائر سے متعلق باتوں کو غیر ضروری طور پر بڑھا چڑھا کر پیش کیا گیا ہے۔ ہمیں اپنے ذخائر کا مکمل علم ہے اور ہمارے پاس کافی مقدار موجود ہے۔