وزیراعظم محمد شہباز شریف نے مستحق اور نادار افراد کو سہولیات کی بروقت فراہمی کو حکومت کی اولین ترجیحات میں شامل قرار دیتے ہوئے پاکستان بیت المال میں درخواستوں کی پراسیسنگ تیز کرنے اور درخواست جمع کرانے کے طریقہ کار کو مزید آسان بنانے کی ہدایت جاری کر دی۔
وزیراعظم محمد شہباز شریف سے منیجنگ ڈائریکٹر پاکستان بیت المال کیپٹن (ر) شہباز بٹ نے ملاقات کی۔ ملاقات کے دوران ایم ڈی بیت المال نے ادارے کی مجموعی کارکردگی اور جاری فلاحی اقدامات سے متعلق وزیراعظم کو تفصیلی بریفنگ دی۔
اس موقع پر وزیراعظم شہباز شریف نے کہا کہ مستحق اور نادار افراد کو بروقت سہولیات اور امداد کی فراہمی حکومت کی اولین ترجیحات میں شامل ہے۔ انہوں نے ہدایت کی کہ پاکستان بیت المال میں موصول ہونے والی درخواستوں کی پراسیسنگ کے عمل کو مزید تیز کیا جائے تاکہ ضرورت مند افراد کو جلد از جلد ریلیف فراہم کیا جا سکے۔
وزیراعظم نے اس امر پر بھی زور دیا کہ بیت المال میں درخواستیں جمع کرانے کے طریقہ کار کو مزید آسان اور عوام دوست بنایا جائے تاکہ مستحق افراد کو کسی قسم کی دشواری کا سامنا نہ کرنا پڑے۔
