وزیراعلیٰ پنجاب مریم نواز شریف کا کہنا ہے کہ پاکستان متنوع ثقافتوں، زبانوں، روایات اور اقدار کا مرکز ہے اور ثقافتی تنوع قومی شناخت اور تہذیبی ورثہ کی عکاس ہے۔
یہ بھی پڑھیں: ورلڈ اربن فورم: مریم نواز نے پنجاب پویلین کا افتتاح کردیا، ’اپنی چھت اپنا گھر‘ پروگرام پر شرکا کو بریفنگ
ثقافتی تنوع برائے مکالمہ و ترقی کے عالمی دن پر اپنے خصوصی پیغام میں مریم نواز شریف نے کہا کہ ثقافتی تنوع سے اتحاد و یگانگت، مثبت اقدار، برداشت اور ہم آہنگی کو فروغ ملتا ہے۔
ان کا کہنا تھا کہ اس دن کا مقصد عوام میں مکالمہ اور ترقی کے حوالے سے شعور اجاگر کرنا ہے۔ ان کا مزید کہنا تھا کہ تہذیب، ثقافت اور مشترکہ ورثے کی اہمیت کا شعور رکھنے والے افراد قابل تحسین ہیں۔
وزیراعلیٰ نے کہا کہ متنوع ثقافتی ورثہ دنیا بھر میں پنجاب کی پہچان ہے اور محکمہ اطلاعات و ثقافت صوبے بھر میں ثقافتی ورثے کے تحفظ کے سرگرم عمل ہے۔
مریم نواز نے کہا کہ ثقافت کا تحفظ، ہنر مندوں اور تخلیقی شخصیات کی سرپرستی صوبائی حکومت کی ترجیحات میں شامل ہے۔
انہوں نے کہا کہ پنجاب کے ہنرمندوں کی ملکی و بین الاقوامی مارکیٹ تک رسائی کو یقینی بنانا حکومت کا عزم ہے۔
