سعودی عرب نے حج 2026 کے دوران عازمین حج کی بڑھتی ہوئی تعداد کو مدنظر رکھتے ہوئے مسجد الحرام میں آب زم زم کی فراہمی کے نظام کو مزید وسعت دے دی ہے۔
یہ بھی پڑھیں: پاکستان سے حج پروازوں کی روانگی کا آخری دن، 3ہزار 296 عازمینِ سعودی عرب روانہ ہوں گے
سعودی خبر رساں ایجنسی کے مطابق مسجد الحرام اور مسجد نبویؐ کے امور کی جنرل اتھارٹی نے آب زم زم کی تقسیم کے نظام کو جدید خطوط پر استوار کرتے ہوئے سروس پوائنٹس میں اضافہ، واٹر فاؤنٹینز کی کارکردگی بہتر بنانے، پانی کے ضیاع میں کمی اور فوری رسپانس کے اقدامات کیے ہیں تاکہ حجاج کرام کو ہر وقت معیاری سہولیات فراہم کی جا سکیں۔
نئے انتظامات کے تحت مسجد الحرام اور اس کے صحنوں میں 169 واٹر فاؤنٹینز فعال کیے گئے ہیں جبکہ روزانہ کی بنیاد پر تقریباً 14 ہزار 892 آب زم زم کولرز نصب کیے جا رہے ہیں۔ اس کے علاوہ روزانہ 21 لاکھ سے زائد کپ بھی تقسیم کیے جا رہے ہیں۔
مزید پڑھیے: پاکستان کا حجاج کے لیے تاریخ کا وسیع ترین میڈیکل مشن فعال
رپورٹ کے مطابق روزانہ اوسطاً ایک ہزار 622 مکعب میٹر آب زم زم استعمال ہو رہا ہے جبکہ پانی کے معیار اور حفاظت کو یقینی بنانے کے لیے روزانہ 70 سے زائد معائنہ کارروائیاں کی جا رہی ہیں۔
سعودی حکام نے مختلف مقامات پر طلب اور استعمال کے انداز کا جائزہ لے کر نظام تقسیم کو مزید مؤثر بنایا ہے تاکہ وسائل کا بہتر استعمال ممکن ہو اور خدمات کی روانی متاثر نہ ہو۔
یہ اقدامات حجاج کرام کو بہتر سہولیات فراہم کرنے، آب زم زم کے مراکز پر رش کم کرنے اور مسجد الحرام میں نقل و حرکت کو مزید آسان بنانے کی وسیع حکمت عملی کا حصہ ہیں۔
مزید پڑھیں : سعودی وزارتِ حج کا بڑا اعلان، اگلے حج سیزن کا روڈ میپ پہلے سے تیار
سعودی حکام کے مطابق اس منصوبے کا مقصد پانی کے ضیاع میں کمی اور وسائل کے ذمہ دارانہ استعمال کے ذریعے نظام کو طویل مدت تک مؤثر بنانا بھی ہے۔
