مصنوعی ذہانت کی کمپنی اینتھروپک کے نئے ماڈل کلاڈ فَیبل 5 کی آمد کے بعد ڈویلپرز کے لیے اب 2 مختلف درجوں کے طاقتور اے آئی ماڈلز دستیاب ہیں تاہم ماہرین کا کہنا ہے کہ انتخاب صرف نئے یا پرانے ماڈل کی بنیاد پر نہیں بلکہ ضرورت اور استعمال کے مقصد کے مطابق کیا جانا چاہیے۔
یہ بھی پڑھیں: اینتھروپک نے طاقتور اے آئی ماڈل متعارف کرا دیا، حساس شعبوں میں حفاظتی پابندیاں برقرار
کمپنی کے مطابق فَیبل 5 پیچیدہ، طویل المدتی اور کثیر مرحلہ وار کاموں میں نمایاں برتری رکھتا ہے لیکن اس کی قیمت اوپس 4.8 کے مقابلے میں تقریباً دوگنی ہے اس لیے ڈویلپرز کو فیصلہ کرتے وقت کارکردگی اور لاگت دونوں عوامل کو مدنظر رکھنا ہوگا۔
کوڈنگ اور پیچیدہ تجزیاتی کاموں میں برتری
اینتھروپک کے جاری کردہ اعداد و شمار کے مطابق فَیبل 5 نے سافٹ ویئر انجینیئرنگ اور پیچیدہ استدلال کے شعبے میں اوپس 4.8 سے بہتر نتائج دیے ہیں۔
ایس ڈبلیو ای بینچ پرو نامی بینچ مارک میں فَیبل 5 نے 80.3 فیصد جبکہ اوپس 4.8 نے 69.2 فیصد اسکور حاصل کیا۔ اسی طرح فرنٹیئر کوڈ ٹیسٹ میں بھی دونوں ماڈلز کے درمیان تقریباً 16 پوائنٹس کا فرق ریکارڈ کیا گیا۔
کمپنی کا کہنا ہے کہ جتنا بڑا اور پیچیدہ کام ہوگا فَیبل 5 کی برتری اتنی ہی نمایاں ہوتی جائے گی۔
کاروباری اداروں کا مثبت ردعمل
فَیبل 5 کے ابتدائی صارفین نے بھی اس کی کارکردگی کو سراہا ہے۔
مزید پڑھیے: ’میں نے ہر اصول کی خلاف ورزی کی‘، کمپنی کا پورا ڈیٹا بیس ٹھکانے لگانے کے بعد اے آئی ایجنٹ کلاڈ کا اعتراف
سافٹ ویئر پلیٹ فارم ریپلٹ کے مطابق فَیبل 5 نے مکمل کوڈنگ ٹیسٹوں میں بہترین نتائج دیے جبکہ ایک مالیاتی ادارے نے دعویٰ کیا کہ اس ماڈل نے ایک اہم تجزیاتی کام میں 90 فیصد سے زیادہ کامیابی حاصل کی جو اوپس 4.8 کے مقابلے میں تقریباً 10 فیصد بہتر تھی۔
اسی طرح اسپریڈ شیٹ آٹومیشن کے شعبے میں کام کرنے والی ایک کمپنی نے بتایا کہ فَیبل 5 نے مختلف بینچ مارکس میں اوپس 4.8 کے مقابلے میں 25 سے 30 فیصد بہتر کارکردگی دکھائی۔
قیمت میں نمایاں فرق
فَیبل 5 کی قیمت اوپس 4.8 کے مقابلے میں تقریباً دگنی ہے۔
فَیبل 5 کے لیے ان پٹ ٹوکنز کی قیمت 10 ڈالر فی ملین ٹوکن جبکہ آؤٹ پٹ ٹوکنز کی قیمت 50 ڈالر فی ملین ٹوکن مقرر کی گئی ہے۔
مزید پڑھیں: امریکی عدالت نے ٹرمپ انتظامیہ کو اینتھروپک کے خلاف کارروائی سے روک دیا
اس کے مقابلے میں اوپس 4.8 کے ان پٹ ٹوکنز کی قیمت 5 ڈالر اور آؤٹ پٹ ٹوکنز کی قیمت 25 ڈالر فی ملین ٹوکن ہے۔
تاہم اینتھروپک کا دعویٰ ہے کہ فَیبل 5 پیچیدہ کام کم مراحل میں مکمل کر لیتا ہے، جس سے مجموعی لاگت بعض صورتوں میں کم بھی ہو سکتی ہے۔
حفاظتی نظام اور خودکار منتقلی
فَیبل 5 کی ایک دلچسپ خصوصیت یہ بھی ہے کہ یہ مکمل طور پر خودمختار نہیں ہے۔
ماڈل میں سائبر سیکیورٹی، حیاتیات (بایولوجی)، کیمسٹری اور ماڈل ڈسٹلیشن سے متعلق خصوصی حفاظتی نظام شامل کیے گئے ہیں۔ اگر کسی درخواست میں حساس یا ممکنہ طور پر خطرناک معلومات کی نشاندہی ہو جائے تو فَیبل 5 خودکار طور پر اس درخواست کو اوپس 4.8 کی جانب منتقل کر دیتا ہے۔
اینتھروپک کے مطابق یہ عمل مجموعی درخواستوں کے پانچ فیصد سے بھی کم معاملات میں پیش آتا ہے۔
ڈویلپرز کے لیے کون سا ماڈل بہتر ہے؟
ماہرین کے مطابق اگر مقصد پیچیدہ پروگرامنگ، تحقیقی تجزیہ یا طویل المدتی منصوبوں پر کام کرنا ہو تو فَیبل 5 زیادہ موزوں انتخاب ثابت ہو سکتا ہے۔
البتہ ایسی ایپلی کیشنز جہاں رفتار، کم لاگت اور بڑی تعداد میں درخواستوں کو سنبھالنا اہم ہو وہاں اوپس 4.8 اب بھی ایک مضبوط اور معاشی متبادل سمجھا جا رہا ہے۔
یہ بھی پڑھیے: چیٹ جی پی ٹی کو اشتہارات کیوں نہیں دکھانے چاہییں، اینتھروپک نے دلائل سے واضح کردیا
اینتھروپک کا کہنا ہے کہ دونوں ماڈلز مختلف ضروریات کو مدنظر رکھتے ہوئے تیار کیے گئے ہیں اور مستقبل میں بھی حفاظتی اقدامات کے ساتھ جدید اے آئی سسٹمز کی ترقی جاری رکھی جائے گی۔
