کراچی میں بدھ کے روز بھی شدید گرمی کا سلسلہ جاری رہا جہاں زیادہ نمی کے باعث محسوس ہونے والا درجہ حرارت 49 ڈگری سینٹی گریڈ تک جا پہنچا جبکہ ملک کے مختلف حصوں میں جاری ہیٹ ویو نے شہریوں کی مشکلات میں اضافہ کر دیا ہے۔
یہ بھی پڑھیں: عالمی موسمیاتی ادارے کی وارننگ، گرمی کی نئی لہر اور غیر معمولی بارشیں متوقع
پاکستان محکمہ موسمیات (پی ایم ڈی) کے مطابق کراچی میں بدھ کو زیادہ سے زیادہ درجہ حرارت 37 ڈگری سینٹی گریڈ ریکارڈ کیا گیا تاہم فضاء میں نمی کا تناسب 56 فیصد ہونے کے باعث گرمی کی شدت کہیں زیادہ محسوس کی گئی۔
محکمہ موسمیات نے گزشتہ ہفتے ملک کے مختلف علاقوں کے لیے ہیٹ ویو الرٹ جاری کرتے ہوئے خبردار کیا تھا کہ شدید گرمی کی موجودہ لہر 12 جون تک برقرار رہنے کا امکان ہے۔
پی ایم ڈی کی جانب سے جاری کردہ ایڈوائزری کے مطابق کراچی میں 8 سے 12 جون کے دوران درجہ حرارت 40 سے 43 ڈگری سینٹی گریڈ کے درمیان رہنے کی توقع ہے، جبکہ رات کے اوقات میں بھی درجہ حرارت معمول سے زیادہ رہنے کے باعث شہریوں کو شدید حبس اور گرمی کا سامنا رہے گا۔
مزید پڑھیے: شدید گرمی اور خشک موسم سے ایشیا کی فصلیں متاثر، طاقتور ’ایل نینو‘ کے خدشات بڑھ گئے
محکمہ موسمیات نے خبردار کیا ہے کہ ملک کے بیشتر علاقوں میں درجہ حرارت معمول سے نمایاں حد تک زیادہ رہ سکتا ہے جبکہ سندھ اور بلوچستان کے بعض اضلاع میں درجہ حرارت 48 سے 51 ڈگری سینٹی گریڈ تک پہنچنے کا امکان ہے۔
رپورٹ کے مطابق سندھ کے اضلاع سکھر، شکارپور، قمبر شہدادکوٹ، جیکب آباد، لاڑکانہ، موئن جو دڑو، دادو، شہید بینظیر آباد، گھوٹکی، خیرپور اور نوشہرو فیروز جبکہ بلوچستان کے سبی، تربت اور پنجگور شدید گرمی سے سب سے زیادہ متاثر ہونے والے علاقوں میں شامل ہیں۔
محکمہ موسمیات نے خبردار کیا ہے کہ ہیٹ ویو عوامی صحت اور روزمرہ زندگی پر سنگین اثرات مرتب کر سکتی ہے۔ شہریوں، خصوصاً بچوں، خواتین اور بزرگ افراد کو احتیاطی تدابیر اختیار کرنے، دھوپ میں غیر ضروری نقل و حرکت سے گریز کرنے اور زیادہ سے زیادہ پانی پینے کی ہدایت کی گئی ہے۔
مزید پڑھیں: ملک بھر میں کل سے بارشوں، آندھیوں اور ژالہ باری کی پیشگوئی
شدید گرمی کے باعث کراچی میں فلاحی ادارے بھی متحرک ہیں اور مختلف مقامات پر شہریوں کو ٹھنڈا پانی اور دیگر امدادی سہولیات فراہم کی جا رہی ہیں تاکہ گرمی کی شدت کے اثرات کو کم کیا جا سکے۔
