امریکا کے شہر نیویارک میں باسکٹ بال ٹیم کی تاریخی کامیابی کا جشن اس وقت افراتفری میں تبدیل ہو گیا جب مشتعل ہجوم نے ورلڈ کپ شائقین کی ایک شٹل بس کو آگ لگا دی جبکہ فائرنگ کے واقعے میں ایک نوجوان زخمی ہو گیا۔
برطانوی خبر رساں ادارے روئٹرز کے مطابق یہ واقعہ ہفتہ اور اتوار کی درمیانی شب مین ہیٹن کے علاقے ٹائمز اسکوائر میں پیش آیا، جہاں این بی اے چیمپیئن شپ میں نیویارک نِکس کی فتح کے بعد ہزاروں مداح جشن منانے کے لیے سڑکوں پر نکل آئے تھے۔
جشن کے دوران آتش بازی کی گئی، نعرے لگائے گئے اور شائقین نے اپنی خوشی کا بھرپور اظہار کیا، تاہم رات گزرنے کے ساتھ صورتحال کشیدہ ہوتی چلی گئی اور بعض مقامات پر ہنگامہ آرائی شروع ہو گئی۔
پولیس کے مطابق رات قریباً 2 بجے ٹائمز اسکوائر کے قریب ایک نوجوان کو گولی لگی، جسے فوری طور پر طبی امداد فراہم کی گئی۔ واقعے کے بعد پولیس نے کارروائی کرتے ہوئے تین مشتبہ افراد کو حراست میں لے لیا۔
رپورٹس کے مطابق اسی دوران ورلڈ کپ شائقین کی آمد و رفت کے لیے استعمال ہونے والی شٹل بسوں کا ایک قافلہ بھی ہجوم میں پھنس گیا۔ بتایا جاتا ہے کہ مراکش اور برازیل کے درمیان فٹ بال میچ کے بعد شائقین کو واپس لے جانے والی قریباً 15 بسوں کو سینکڑوں افراد نے گھیر لیا۔
عینی شاہدین کے مطابق بعض افراد بسوں کی چھتوں پر چڑھ گئے جبکہ کچھ افراد ایک بس کے اندر داخل ہو گئے اور ڈرائیور کو نیچے اتار کر خود ڈرائیونگ سیٹ پر بیٹھ گئے۔ اسی دوران کرائے پر حاصل کی گئی ایک پیلی شٹل بس کو آگ لگا دی گئی، جس کے نتیجے میں وہ شعلوں کی لپیٹ میں آ گئی۔
موقع پر موجود ایک صحافی نے بتایا کہ انہوں نے بس کو جلتے ہوئے اپنی آنکھوں سے دیکھا، جبکہ ہجوم نے مزید 3 شٹل بسوں کو بھی نقصان پہنچایا۔
ابتدائی اطلاعات کے مطابق گولی لگنے والے نوجوان کے علاوہ کسی اور کے زخمی ہونے کی تصدیق نہیں ہو سکی، تاہم ایک شخص کو خون آلود چہرے کے ساتھ بھی دیکھا گیا، جس کی چوٹ کی نوعیت فوری طور پر معلوم نہ ہو سکی۔
مزید پڑھیں: فیفا ورلڈ کپ: آخری لمحات میں قطر کی واپسی، سوئٹزرلینڈ کے خلاف میچ برابر
ہجوم میں پھنس جانے والے 49 سالہ مراکشی نژاد کینیڈین یوسف صابر نے بتایا کہ لوگ فتح کا جشن منا رہے تھے، لیکن بعض افراد کا رویہ غیر معمولی طور پر جارحانہ اور پرتشدد تھا۔
صورتحال قابو سے باہر ہونے پر پولیس نے علاقے کی متعدد سڑکیں رکاوٹیں لگا کر بند کر دیں اور خصوصی دستے طلب کیے گئے۔ اہلکاروں نے موقع پر پہنچ کر ہجوم کو منتشر کیا اور امن و امان بحال کرنے کے لیے کارروائی کی۔
