پاکستانی کرکٹ ٹیم کے سابق کپتان شاہد آفریدی نے اقوامِ متحدہ کے ہیڈکوارٹرز نیویارک کا دورہ کیا اور اقوامِ متحدہ میں پاکستان کے مستقل مندوب سفیر عاصم افتخار احمد سے ملاقات کی۔
شاہد آفریدی یہ دورہ اقوامِ متحدہ میں پاکستان کے مستقل مشن کی دعوت پر کیا جہاں انہیں عالمی ادارے کے مختلف شعبہ جات اور اس کے عملی کام سے متعلق آگاہ کیا گیا۔ انہیں بریفنگ دی گئی کہ اقوامِ متحدہ کس طرح بین الاقوامی امن و سلامتی کے فروغ، پائیدار ترقی کے اہداف اور رکن ممالک کے درمیان کثیرالجہتی تعاون کو مضبوط بنانے کے لیے کردار ادا کر رہا ہے۔
What happens when one of Pakistan's stylish cricket stars steps into the premier arena of global diplomacy?
At the UN Headquarters today, former Pakistan cricket captain, Shahid Afridi and Ambassador Asim Iftikhar Ahmad, Permanent Representative of Pakistan to the UN, explored… pic.twitter.com/yDAjMiDrhO
— Permanent Mission of Pakistan to the UN (@PakistanUN_NY) June 17, 2026
ملاقات کے دوران سفیر عاصم افتخار احمد نے شاہد آفریدی کا خیرمقدم کیا اور پاکستان کرکٹ میں ان کی شاندار خدمات کو خراجِ تحسین پیش کیا۔ انہوں نے کہا کہ آفریدی نے اپنی جارحانہ بیٹنگ، آل راؤنڈ کارکردگی اور یادگار پرفارمنسز کے ذریعے نہ صرف پاکستان بلکہ عالمی سطح پر بھی نام روشن کیا۔
سفیر نے شاہد آفریدی کی فلاحی اور انسانی خدمت کی سرگرمیوں کو بھی سراہا اور کہا کہ ان کی سماجی بہبود کے لیے کی جانے والی کاوشیں معاشرے کے محروم طبقات کے لیے امید اور سہارا ثابت ہوئی ہیں۔
یہ بھی پڑھیں: شاہد آفریدی کا اپنی بیٹیوں کے موبائل استعمال سے متعلق حیرت انگیز انکشاف
اس موقع پر گفتگو میں اس بات پر زور دیا گیا کہ کھیل صرف تفریح نہیں بلکہ ایک مؤثر سپورٹس ڈپلومیسی کا ذریعہ بھی ہیں جو مختلف ممالک اور اقوام کے درمیان فاصلے کم کر کے باہمی احترام، مکالمے اور تعاون کو فروغ دیتے ہیں۔ سفیر نے اقوامِ متحدہ میں پاکستان کے مستقل مشن کے کردار پر بھی روشنی ڈالی اور بتایا کہ پاکستان عالمی امن، سفارتی روابط اور کثیرالجہتی نظام کے استحکام کے لیے فعال کردار ادا کرتا آ رہا ہے۔
شاہد آفریدی نے دورے اور پرتپاک میزبانی پر شکریہ ادا کرتے ہوئے اقوامِ متحدہ میں پاکستان مشن کے کردار کو سراہا اور کہا کہ سفارت کاری اور کھیل مل کر دنیا میں امن اور بہتر تعلقات کے فروغ میں اہم کردار ادا کر سکتے ہیں۔
یہ بھی پڑھیں: شاہد آفریدی نے حکومت کی طرف سے دیا گیا تمغہ امتیاز شہدائے وطن کے نام کردیا
بعد ازاں سفیر عاصم افتخار احمد نے ان کے اعزاز میں عشائیہ بھی دیا، جس میں اقوامِ متحدہ میں پاکستان کے نائب مستقل مندوب سفیر عثمان جدون، مشن کے افسران اور دیگر معزز مہمان شریک ہوئے۔
