پشاور پولیس نے ضلع خیبر میں ایک گھر پر چھاپہ مار کر فرانسیسی خاتون سلوی یاسمینہ کو بازیاب کرا لیا، جنہیں مبینہ طور پر گھریلو تشدد کا نشانہ بنایا جا رہا تھا۔
سی سی پی او پشاور میاں سعید کے مطابق متاثرہ خاتون نے ایک پاکستانی شہری سے شادی کی تھی اور وہ 2014 سے ضلع خیبر کے علاقے باڑہ میں مقیم تھیں۔
انہوں نے بتایا کہ خاتون کے مطابق انہیں اپنے شوہر کی جانب سے مسلسل بدسلوکی کا سامنا تھا، جبکہ انہیں گھر سے باہر جانے کی بھی اجازت نہیں دی جاتی تھی۔
سی سی پی او کا کہنا تھا کہ فرانسیسی خاتون نے خواہش ظاہر کی ہے کہ وہ واپس فرانس جانا چاہتی ہیں، جس کے بعد فارن آفس کے ذریعے فرانسیسی سفارت خانے کو باقاعدہ مراسلہ ارسال کردیا گیا ہے۔
میاں سعید کے مطابق متاثرہ خاتون کے شوہر کے خلاف مقدمہ درج کرلیا گیا ہے، جبکہ واقعے کے مختلف پہلوؤں پر مزید تفتیش اور قانونی کارروائی جاری ہے۔
