معروف اداکارہ اور ٹی وی میزبان جگن کاظم نے ملک میں جاری شدید گرمی کے پیش نظر عوام سے درد مندانہ اپیل کی ہے کہ وہ نہ صرف اپنے پالتو بلکہ آوارہ جانوروں کا بھی خاص خیال رکھیں اور انہیں پانی، سایہ اور آرام کی مناسب جگہ فراہم کریں۔
انہوں نے یاد دلایا کہ یہ شدید گرمی صرف انسانوں کے لیے ہی نہیں بلکہ بے زبان جانوروں کے لیے بھی انتہائی تکلیف دہ ہوتی ہے۔
انسٹاگرام ویڈیو اور پالتو جانور کی دیکھ بھال
جگن کاظم نے اپنے آفیشل انسٹاگرام اکاؤنٹ پر ایک ویڈیو شیئر کی، جس میں وہ شدید گرمی سے لوٹنے والے اپنے پالتو کتے کو گیلے کپڑے کی مدد سے ٹھنڈک پہنچاتی نظر آئیں۔
یہ بھی پڑھیں:وزیراعلیٰ مریم نواز کی ہدایت پر پنجاب کے چڑیا گھروں میں جانوروں کو شدید گرمی سے بچانے کے لیے خصوصی انتظامات
اس موقع پر انہوں نے جانوروں کی دیکھ بھال کی اہمیت پر زور دیتے ہوئے عوام کے نام ایک خصوصی پیغام بھی ریکارڈ کروایا۔
اداکارہ نے اپنے پیغام میں کہا کہ ’جیسے آپ اپنی دیکھ بھال کرتے ہیں، پانی پیتے ہیں اور سایہ دار جگہ پر بیٹھتے ہیں، اسی طرح ان جانوروں کا بھی خیال رکھیں‘۔
شہریوں کے لیے اہم مشورے اور اقدامات
اداکارہ نے واضح کیا کہ یہ ذمہ داری صرف گھروں میں موجود پالتو جانوروں تک محدود نہیں ہونی چاہیے بلکہ سڑکوں پر گھومنے والے آوارہ جانور بھی توجہ کے مستحق ہیں۔
انہوں نے عوام سے اپیل کی کہ وہ اپنے گھروں، دفاتر اور دکانوں کے باہر پانی سے بھرا ایک برتن لازمی رکھیں تاکہ پیاسے جانور اپنی پیاس بجھا سکیں۔
جگن کاظم نے مزید کہا کہ ’آوارہ جانوروں کو گاڑیوں کے شیڈ، درختوں کے نیچے یا عمارتوں کے سائے میں آرام کرنے دیں اور انہیں وہاں سے نہ بھگائیں‘۔
اس کے ساتھ ہی انہوں نے پالتو جانوروں کے مالکان کو مشورہ دیا کہ وہ شدید گرمی کے دوران اپنے جانوروں کو ہوادار یا ایئرکنڈیشنڈ جگہوں پر رکھیں۔
احساس اور مہربانی کا پیغام
اپنی اس مہم کو ’محبت بھری ایک چھوٹی سی گزارش‘ قرار دیتے ہوئے انہوں نے پوسٹ کے کیپشن میں لکھا کہ ’یہ گرمی ہم سب کے لیے مشکل ہے۔ ذرا تصور کریں ان جانوروں پر کیا گزرتی ہوگی جن کے پاس نہ پنکھا ہے، نہ سایہ اور نہ ہی مدد مانگنے کا کوئی طریقہ‘۔
مزید پڑھیں:ہیٹ ویوز کے دوران پالتو جانوروں کو موسمی اثرات سے کیسے بچایا جائے؟
اپنے پیغام کے اختتام پر جگن کاظم نے کہا کہ مہربانی کے لیے ہمیشہ بڑے اقدامات کی ضرورت نہیں ہوتی، کبھی کبھی صرف یہ یاد رکھنا ہی کافی ہوتا ہے کہ اس دنیا میں صرف ہم نہیں رہتے، بلکہ دوسرے جاندار بھی ہمارے ساتھ شریک ہیں۔
انہوں نے عوام سے اپیل کی کہ وہ ان بے زبانوں کے ساتھ نرمی اور احساس کا مظاہرہ کریں۔
