خیبرپختونخوا کو گزشتہ پانچ سال کے دوران وفاق کی جانب سے 34 کھرب 88 ارب 67 کروڑ 50 لاکھ روپے فراہم کیے گئے ہیں، جن کی تفصیلات سامنے آگئی ہیں۔
صوبائی اسمبلی میں جمع کرائی گئی سرکاری دستاویزات کے مطابق یہ فنڈز 2021 سے 2025 کے دوران این ایف سی ایوارڈ اور دہشتگردی کے خلاف جنگ کی مد میں صوبے کو منتقل کیے گئے۔
سرکاری ریکارڈ کے مطابق گزشتہ 5 برسوں میں وفاق نے خیبرپختونخوا کو این ایف سی کی مد میں 31 کھرب 14 ارب 45 کروڑ روپے فراہم کیے، جبکہ دہشتگردی کے خلاف جنگ (وار آن ٹیرر) کی مد میں 3 کھرب 74 ارب 22 کروڑ 40 لاکھ روپے دیے گئے۔
دستاویزات میں بتایا گیا ہے کہ خیبرپختونخوا کو وفاق سے سب سے زیادہ فنڈز مالی سال 25-2024 کے دوران موصول ہوئے، جب صوبے کو مجموعی طور پر 10 کھرب 46 ارب 87 کروڑ 50 لاکھ روپے ملے۔
ان میں این ایف سی کی مد میں 9 کھرب 34 ارب 57 کروڑ 90 لاکھ روپے جبکہ وار آن ٹیرر کی مد میں ایک کھرب 12 ارب 22 کروڑ 96 لاکھ روپے شامل ہیں۔
دستاویزات کے مطابق گزشتہ 5 سال کے دوران وفاقی فنڈز میں خیبرپختونخوا کا مجموعی حصہ 36 کھرب 47 ارب 64 کروڑ 90 لاکھ روپے بنتا ہے۔
