نائب وزیراعظم و وزیر خارجہ سینیٹر اسحاق ڈار نے اسلامی تعاون تنظیم (او آئی سی) کی خواتین سے متعلق 9ویں وزارتی کانفرنس کی تیاریوں کا جائزہ لینے کے لیے قائم اعلیٰ سطحی کمیٹی کے ساتویں اجلاس کی صدارت کی۔
ترجمان دفتر خارجہ کے مطابق اجلاس میں کانفرنس کی تیاریوں کا تفصیلی جائزہ لیا گیا، جس میں کانفرنس کے مقام، پروگرام، غیر ملکی وفود کی سہولت، پروٹوکول، سیکیورٹی، لاجسٹکس، میڈیا انتظامات اور مختلف وزارتوں کے درمیان رابطہ کاری سمیت تمام انتظامی امور پر غور کیا گیا تاکہ کانفرنس کے کامیاب اور مؤثر انعقاد کو یقینی بنایا جا سکے۔
Deputy Prime Minister and Foreign Minister Senator Mohammad Ishaq Dar @MIshaqDar50 chaired the 7th meeting of the High-Level Committee overseeing preparations for the 9th OIC Ministerial Conference on Women, which Pakistan will host on 12–13 July 2026.
The Committee conducted a… pic.twitter.com/mZh6LWyAQz
— Ministry of Foreign Affairs – Pakistan (@ForeignOfficePk) July 8, 2026
نائب وزیراعظم و وزیر خارجہ اسحاق ڈار نے ہدایت کی کہ تیاریوں کے آخری مرحلے میں تمام امور کو انتہائی پیشہ ورانہ انداز میں مکمل کیا جائے۔
انہوں نے متعلقہ وزارتوں، ڈویژنز اور اداروں کو ہدایت کی کہ وہ مکمل طور پر متحرک رہیں، باہمی رابطہ مزید مؤثر بنائیں اور باقی ماندہ تمام کام مقررہ وقت کے اندر مکمل کریں۔
اجلاس میں وزیراعظم کے معاونِ خصوصی طارق باجوہ، پارلیمانی سیکریٹری برائے انسانی حقوق صبا صادق، سیکریٹری انسانی حقوق، سیکریٹری کابینہ ڈویژن اور متعلقہ وزارتوں کے اعلیٰ حکام نے شرکت کی۔
واضح رہے کہ پاکستان 12 اور 13 جولائی کو ہونے والی او آئی سی وزارتی کانفرنس برائے خواتین کی میزبانی کرے گا، جس میں رکن ممالک کے وزرا، اعلیٰ حکام اور مندوبین خواتین کے حقوق، بااختیاری اور مسلم دنیا میں ان سے متعلق پالیسی امور پر تبادلہ خیال کریں گے۔
