وزیر صحت پنجاب خواجہ عمران نذیر کی پسرور میں تحصیل ہیڈ کوارٹر (ٹی ایچ کیو) اسپتال کے دورے کی ایک ویڈیو سوشل میڈیا پر وائرل ہو رہی ہے جس میں وہ خالی کمروں میں ائیر کنڈیشنرز چلنے پر شدید برہمی کا اظہار کرتے دکھائی دیتے ہیں۔
دورے کے دوران وزیر صحت نے اسپتال کے بعض کمروں میں افسران اور عملے کی غیر موجودگی کے باوجود اے سی چلتے دیکھ کر انتظامیہ کو سخت تنقید کا نشانہ بنایا۔ انہوں نے کہا کہ آن لائن اجلاس میں واضح ہدایت دی گئی تھی کہ کوئی بھی اے سی 26 ڈگری سینٹی گریڈ سے کم پر نہیں چلایا جائے گا پھر بھی ان احکامات کی خلاف ورزی کیوں کی گئی؟
مذکورہ ویڈیو کا کل اخلاقی سبق….!!!
میٹرک اچھے سکول سے کریں، ٹیوشن رکھیں، بہترین نمبر لیں، پھر FSC میں ٹاپ میرٹ حاصل کریں، MDCAT کی مہنگی تیاری کریں، ٹیسٹ پاس کریں،
پانچ سالہ MBBS پر کروڑوں روپے اور جوانی کے کئی سال صرف کریں، PMDC کے مراحل بھی مکمل کریں، اور آخر میں فارم 47 کے… pic.twitter.com/nVKtJ8J05Y— Zeshan Noor 🇵🇰 (@ZeshanNoor007) July 13, 2026
خواجہ عمران نذیر نے کہا کہ ’لوگ شدید گرمی سے متاثر ہیں، ملک کو توانائی کے بحران کا سامنا ہے لیکن یہاں خالی کمروں میں اے سی چلائے جا رہے ہیں۔ آپ کو اندازہ ہے کہ انرجی کرائسز کیا ہے؟ آپ کو شرم آنی چاہیے کہ کمرے میں کوئی موجود نہیں اور پھر بھی اے سی چل رہا ہے‘۔
وزیر صحت نے موقع پر موجود حکام کو ذمہ دار اہلکاروں کے خلاف فوری کارروائی کی ہدایت دیتے ہوئے کہا کہ غفلت کے مرتکب افراد کو عہدوں سے ہٹا دیا جائے۔
یہ بھی پڑھیں: ممبئی کے ریلوے اسٹیشن پر نوجوان لڑکی کے پاؤں سے لپٹ گیا، جذباتی منظر کی ویڈیو وائرل
وزیر صحت کی یہ ویڈیو سوشل میڈیا پر تیزی سے وائرل ہو رہی ہے جہاں صارفین سرکاری اداروں میں توانائی کے غیر ضروری استعمال اور انتظامی غفلت پر مختلف آرا کا اظہار کر رہے ہیں۔ کسی نے خواجہ عمران نذیر کے رویے پر تنقید کی تو کوئی ان کے حق میں بات کرتا نظر آیا کہ انہوں نے بالکل ٹھیک کہا ہے۔
