وفاقی وزیر منصوبہ بندی و ترقی احسن اقبال نے جمعیت علمائے اسلام (ف) کے سربراہ مولانا فضل الرحمان کے حالیہ بیان پر ردعمل دیتے ہوئے کہا ہے کہ شہداء کی عظیم قربانیوں کو کسی بھی صورت تنخواہ یا مالی معاوضے سے نہیں تولا جا سکتا۔
مزید پڑھیں:پنجاب اسمبلی میں مولانا فضل الرحمان کے بیان کے خلاف قرارداد جمع، قانونی کارروائی کا مطالبہ
سماجی رابطے کی ویب سائٹ ایکس پر جاری اپنے تفصیلی پیغام میں احسن اقبال نے مولانا فضل الرحمان سے مخاطب ہوتے ہوئے کہا کہ ان کا تعلق ہمیشہ احترام پر مبنی رہا ہے، تاہم ان کے حالیہ بیان سے یہ تاثر پیدا ہوا کہ جذبات کی رو میں بہہ کر شہدا کی عظیم قربانیوں کی قدر و منزلت کو کم کرکے پیش کیا گیا، جس سے نہ صرف ان کے بلکہ کروڑوں پاکستانیوں کے جذبات مجروح ہوئے۔
انہوں نے کہا کہ فوجی جوان اور افسر محض ایک پیشہ انجام نہیں دیتے بلکہ ہر لمحہ اپنی جان ہتھیلی پر رکھ کر وطن کے دفاع کا فریضہ ادا کرتے ہیں۔ ان کے مطابق قوم آج اپنے گھروں، مساجد، مدارس اور عوامی اجتماعات میں امن کے ساتھ موجود ہے تو اس کے پیچھے سرحدوں اور دہشتگردی کے خلاف محاذ پر ڈٹے ہوئے انہی جوانوں کی قربانیاں ہیں۔
مولانا صاحب!
آپ سے ہمارا تعلق ہمیشہ احترام کا رہا ہے، اسی احترام کے جذبے کے تحت چند گزارشات پیش کرنا چاہتا ہوں۔
آپ کے حالیہ بیان سے یہ تاثر پیدا ہوا کہ آپ نے جذبات کی رو میں بہہ کر ہمارے شہداء کی عظیم قربانیوں کی قدر و منزلت کو کم کرکے پیش کیا۔ اس سے نہ صرف میرے بلکہ کروڑوں…— Ahsan Iqbal (@betterpakistan) July 13, 2026
احسن اقبال نے کہا کہ فوجی جوان یہ جانتے ہوئے بھی اپنی ذمہ داریاں نبھاتے ہیں کہ اگلا لمحہ ان کی زندگی کا آخری لمحہ ہو سکتا ہے، اس لیے ان کی قربانی کو محض تنخواہ کا معاوضہ قرار دینا نہ انصاف ہے، نہ اخلاقی تقاضوں کے مطابق اور نہ ہی اسلامی تعلیمات سے ہم آہنگ۔
انہوں نے کہا کہ شہدا قوموں کی عزت، آزادی اور وقار کے محافظ ہوتے ہیں اور ان کی قربانیاں ہی آنے والی نسلوں کو امن اور آزادی فراہم کرتی ہیں۔ ان کا کہنا تھا کہ اختلافِ رائے ہر شخص کا حق ہے، مگر شہدا کے مقام و مرتبے پر گفتگو کرتے ہوئے ایسے الفاظ سے اجتناب کرنا چاہیے جو ان کے اہلِخانہ، ساتھیوں اور پوری قوم کے جذبات کو ٹھیس پہنچائیں۔
احسن اقبال نے مزید کہا کہ شہدا کا احترام درحقیقت پاکستان، اس کی آزادی اور ان اسلامی اقدار کے احترام کا تقاضا ہے جو ایثار، قربانی اور وفاداری پر قائم ہیں۔
