وزیراعظم پاکستان شہباز شریف نے کہا ہے کہ لائیو اسٹاک کے شعبے میں بے پناہ صلاحیت ہے، ایک ہزار نوجوان زرعی گریجویٹس کو میرٹ کی بنیاد پر چین بھیجا جا چکا ہے، جبکہ مزید ایک ہزار بچوں اور بچیوں کو تربیت کے لیے چین بھیجا جائےگا۔ لائیو اسٹاک اور زراعت پر توجہ دے کر ایک سال میں معیشت بہتر کی جا سکتی ہے۔
لائیو اسٹاک کی استعداد کے حوالے سے منعقدہ قومی سیمینار سے خطاب کرتے ہوئے کہاکہ وزیراعظم نے کہاکہ ملکی لائیو اسٹاک کے شعبے سے متعلق سیمینار کا انعقاد خوش آئند ہے اور وہ اس کے منتظمین کو دل کی گہرائیوں سے مبارکباد پیش کرتے ہیں۔
مزید پڑھیں: پاکستان میں پہلی بار لائیو اسٹاک انشورنس اسکیم متعارف
وزیراعظم نے کہاکہ ملکی لائیو اسٹاک کے شعبے میں بے پناہ صلاحیت موجود ہے۔ چین پاکستان کا انتہائی قابلِ اعتماد دوست ہے اور چین کے ساتھ پاکستان ایگریکلچر ریسرچ کونسل کی ٹرانسفارمیشن سے متعلق بات چیت جاری ہے۔
انہوں نے کہاکہ لائیو اسٹاک کے شعبے کی ترقی کے لیے وفاق اور صوبوں کو مل کر کام کرنا ہوگا، جبکہ زراعت اور لائیو اسٹاک کے شعبوں میں محنت سے کام کیا جائے تو ایک سال میں معیشت کو بہتر بنایا جا سکتا ہے۔
شہباز شریف نے کہاکہ لائیو اسٹاک کا شعبہ غذائی تحفظ کے حوالے سے انتہائی اہمیت کا حامل ہے۔
انہوں نے اعلان کیاکہ جانوروں کی بیماریوں کے تدارک کے لیے درکار فنڈز فراہم کیے جائیں گے۔
انہوں نے متعلقہ حکام کو مزید ایک ہزار زرعی گریجویٹس کو تربیت کے لیے چین بھیجنے کے اقدامات کی ہدایت دیتے ہوئے کہا کہ یہ نوجوان جدید تربیت حاصل کرکے ملک کو ترقی کی راہ پر گامزن کریں گے۔
وزیراعظم نے کہاکہ مصنوعی ذہانت اور جدید طریقوں کے ذریعے زراعت اور لائیو اسٹاک کے شعبے کو ترقی دینی ہے۔ ہمیں صوبوں کے ساتھ مل کر ایک طویل سفر طے کرنا ہے اور باتوں سے آگے بڑھ کر عملی اقدامات کی جانب تیزی سے بڑھنا ہوگا۔
انہوں نے کہاکہ اللہ تعالیٰ نے پاکستان کو بے شمار وسائل سے نوازا ہے اور ہمارے کسان دن رات محنت کرکے ملکی ترقی میں اپنا کردار ادا کر رہے ہیں۔
مزید پڑھیں: پاکستان کی تاریخ کے پہلے ’لائیو اسٹاک کارڈ‘ اور ’فارمر رہنمائی ایپ‘ کا اجرا
وزیراعظم نے کہاکہ جدید ٹیکنالوجی کی عدم دستیابی کی وجہ سے پاکستان خطے میں لائیو اسٹاک کے شعبے میں پیچھے ہے، حالانکہ دودھ کی پیداوار کے حوالے سے پاکستان دنیا میں چوتھے نمبر پر شمار ہوتا ہے۔
