اسلام آباد پولیس نے ’اسلحہ سے پاک اسلام آباد‘ مہم کے تحت بڑی کارروائی کرتے ہوئے تھانہ نون کے علاقے سے ایک مبینہ اسلحہ ڈیلر کو گرفتار کر لیا۔ پولیس نے ملزم کے قبضے سے آٹو میٹک مشین گنز، کلاشنکوف، پستول اور ریوالور سمیت بھاری مقدار میں غیر قانونی اسلحہ برآمد کر لیا۔
ترجمان اسلام آباد پولیس کے مطابق ’اسلحہ سے پاک اسلام آباد‘ مہم کے تحت تھانہ نون پولیس نے کامیاب کارروائی کرتے ہوئے غیر قانونی اسلحہ رکھنے میں ملوث مبینہ اسلحہ ڈیلر شاہ صاحب جان کو گرفتار کر لیا۔
یہ بھی پڑھیں:کالعدم ایکشن کمیٹی اوچھے ہتھکنڈوں پر اتر آئی، اسلام آباد پولیس کے اہلکار کو گاڑی سے اتار کر تشدد کا نشانہ بنا ڈالا
پولیس کے مطابق ملزم کے قبضے سے 3 آٹو میٹک مشین گنیں، ایک کلاشنکوف، 30 بور کے 2 پستول اور ایک ریوالور برآمد کیا گیا، جسے قبضے میں لے کر مزید قانونی کارروائی شروع کر دی گئی ہے۔
ایس ایس پی آپریشنز قاضی علی رضا نے کہا کہ اسلام آباد پولیس غیر قانونی اسلحہ رکھنے اور اس کی نمائش کے خلاف زیرو ٹالرنس پالیسی پر عمل پیرا ہے۔ انہوں نے کہا کہ خصوصی پولیس ٹیمیں غیر قانونی اسلحہ رکھنے میں ملوث عناصر کے خلاف ٹارگٹڈ آپریشنز جاری رکھے ہوئے ہیں۔
انہوں نے مزید کہا کہ انسپکٹر جنرل اسلام آباد پولیس کے احکامات پر ’اسلحہ سے پاک اسلام آباد‘ مہم کے تحت شہر بھر میں بھرپور کارروائیاں جاری رہیں گی اور قانون شکن عناصر کے خلاف بلاامتیاز کارروائی عمل میں لائی جائے گی۔
