برازیل کے عظیم فٹبالر پیلے کی 1958 فیفا ورلڈ کپ فائنل میں پہنی گئی تاریخی جرسی نیلامی میں 49 لاکھ ڈالر میں فروخت ہوگئی، جس کے ساتھ ہی یہ فٹبال لیجنڈ سے منسلک اب تک کی سب سے قیمتی یادگار بن گئی۔
بین الاقوامی نیلام گھر سوتھبیز کے مطابق نمبر 10 کی یہ جرسی اس وقت کے 17 سالہ پیلے نے 1958 کے ورلڈ کپ فائنل میں پہنی تھی، جہاں برازیل نے میزبان سویڈن کو 2-5 سے شکست دے کر اپنی تاریخ کا پہلا عالمی ٹائٹل جیتا تھا۔
یہ بھی پڑھیں: فیفا فٹبال میں چھپی صدی کی کہانی
سوتھبیز کے مطابق نیلامی کے دوران 5 سے زائد خریداروں نے مجموعی طور پر 10 بولیاں لگائیں، جس کے بعد یہ جرسی 49 لاکھ ڈالر میں فروخت ہوئی۔
یہ جرسی نیلامی میں فروخت ہونے والی دنیا کی دوسری مہنگی ترین فٹبال شرٹ بھی بن گئی۔
La camiseta que Pelé utilizó durante la final del Mundial 1958 contra Suecia fue subastada en 4.9 millones de dólares. #LasNoticiasDeFORO | #nmásforo | #SiempreEnVivo | #SiempreContigo | Sigue la señal en vivo por https://t.co/R0rtaHzqZe pic.twitter.com/D7bYEhDK9U
— N+ FORO (@nmasforo) July 17, 2026
اس فہرست میں پہلی پوزیشن ارجنٹائن کے عظیم فٹبالر ڈیاگو میراڈونا کی اس جرسی کے پاس ہے، جو انہوں نے 1986 ورلڈ کپ میں انگلینڈ کے خلاف اپنے مشہور زمانہ ’ہینڈ آف گاڈ‘ گول کے دوران پہنی تھی اور 2022 میں 93 لاکھ ڈالر میں فروخت ہوئی تھی۔
مزید پڑھیں: لیاری کا جنون اور فٹ بال ورلڈ کپ، ’منی برازیل‘ اپنی ٹیم کو کیسے سپورٹ کر رہا ہے؟
پیلے نے، جن کا 2022 میں 82 برس کی عمر میں انتقال ہوا، 1958 کے ورلڈ کپ فائنل میں 2 گول کیے تھے اور وہ آج بھی ورلڈ کپ فائنل میں گول کرنے والے کم عمر ترین کھلاڑی کا اعزاز رکھتے ہیں۔
سوتھبیز کے مطابق یہی جرسی اس سے قبل 2004 میں بھی نیلام ہوئی تھی، جب اسے 70 ہزار 505 برطانوی پاؤنڈ یعنی تقریباً ایک لاکھ 5 ہزار 600 ڈالر میں فروخت کیا گیا تھا۔
