پشاورمیں سیکیورٹی خدشات کے پیش نظر اگلے 10 دن کے لیے دفعہ 144 نافذ کر دی گئی۔
ڈپٹی کمشنر آفس پشاورکے میڈیا سیل کے جاری کردہ بیان کے مطابق سیکیورٹی کی نازک صورتحال کے باعث دفعہ 144 نافذ کی گئی ہے جس کا اطلاق ہفتہ سے ہوگا اور یہ پابندی 10 دن تک جاری رہے گی۔
پشاور کے ڈپٹی کمشنر شفیع اللہ کے مطابق سیکیورٹی خدشات کی وجہ سے 5 یا زیادہ افراد کے ایک جگہ جمع ہونے پر پابندی عائد کر دی ہے۔
بیان میں کہا گیا کہ 5 یا اس سے زائد افراد کے ایک جگہ جمع ہونے کی ممانعت ہوگی اور خلاف ورزی کرنے والوں کو دفعہ 188 کے تحت کارروائی کا سامنا کرنا پڑے گا۔
واضح رہے کہ دفعہ 144 اس وقت نافذ کی گئی ہے جب ایک غیری سیاسی ادارے پشاور اولسی تحریک پولیس لائنز میں دھماکے کے بعد امن و امان کی صورتحال اور کالعدم ٹی ٹی پی کے خلاف پشاور میں احتجاج کرنے جا رہی ہے۔
یاد رہے کہ پیر کو پشاور پولیس لائنز کی جامع مسجد میں خود کش دھماکے کے نتیجے میں 100 سے زائد افراد شہید ہو گئے تھے جس میں اکثریت پولیس افسران اور اہلکاروں کی تھی۔ اس کارروائی کے بعد شہید پولیس اہلکاروں کے اہلخانہ اور محکمہ پولیس کے ملازمین کی جانب سے شدید احتجاج کیا جا رہا ہے۔
