سری لنکا ویمن کرکٹ ٹیم نے دوسرے ایک روزہ میچ میں پاکستان ویمن ٹیم کو 8 وکٹوں سے شکست دے کر 3 میچوں کی سیریز 1-1 سے برابر کر دی۔ میزبان ٹیم کی کامیابی میں وشمی گونا رتنے اور ہرشیتا سامارا وکرما کی شاندار سنچریاں فیصلہ کن ثابت ہوئیں۔
ہمبنٹوٹا میں کھیلے گئے میچ میں پاکستان نے ٹاس کے بعد پہلے بیٹنگ کرتے ہوئے مقررہ 50 اوورز میں 5 وکٹوں کے نقصان پر 273 رنز اسکور کیے۔
🏏 2nd ODI – Hambantota 🏟️
Sri Lanka Women win by 8 wickets 🏏#SLWvPAKW | #BackOurGirls pic.twitter.com/nr4alwokRA
— Pakistan Cricket (@TheRealPCB) July 25, 2026
پاکستانی اننگز کا آغاز زیادہ مضبوط نہ تھا، جہاں صدف شمس 12 اور گلفروزہ 27 رنز بنا کر پویلین لوٹ گئیں۔
اس کے بعد سدرا امین اور عائشہ ظفر نے ذمہ دارانہ بیٹنگ کرتے ہوئے ٹیم کی اننگز کو سنبھالا۔
سدرا امین نے عمدہ کھیل کا مظاہرہ کرتے ہوئے 120 گیندوں پر 100 رنز کی اننگز کھیلی، جس میں 11 چوکے شامل تھے، جبکہ عائشہ ظفر نے 49 اور منیبہ علی نے 45 رنز کا اضافہ کیا۔
274 رنز کے ہدف کے تعاقب میں سری لنکا کو ابتدا میں دھچکا لگا اور کپتان چماری اتاپتو صرف ایک رن بنا کر آؤٹ ہو گئیں، تاہم اس کے بعد وشمی گونا رتنے اور ہرشیتا سامارا وکرما نے دوسری وکٹ کے لیے 203 رنز کی شراکت قائم کر کے میچ کا رخ یکسر بدل دیا۔
وشمی گونا رتنے نے 123 رنز کی شاندار اننگز کھیلی، جس میں 11 چوکے اور ایک چھکا شامل تھا، جبکہ ہرشیتا سامارا وکرما نے ناقابلِ شکست 100 رنز بنا کر اپنی ٹیم کو فتح دلائی۔ سری لنکا نے مطلوبہ ہدف 47ویں اوور میں صرف 2 وکٹوں کے نقصان پر حاصل کر لیا۔
3 ایک روزہ میچوں کی سیریز اب ایک، ایک سے برابر ہو چکی ہے، جبکہ سیریز کا فیصلہ کن اور آخری ون ڈے 31 جولائی کو دمبولا میں کھیلا جائےگا۔
