پیرو میں نازکا لائنز کی سیر کے لیے جانے والا سیاحتی طیارہ گر کر تباہ، 13 افراد ہلاک

پیرو میں نازکا لائنز کی فضائی سیر کے لیے جانے والا ایک چھوٹا سیاحتی طیارہ پرواز بھرنے کے فوراً بعد گر کر تباہ ہوگیا، جس کے نتیجے میں 11 مسافروں اور عملے کے 2 ارکان سمیت 13 افراد ہلاک ہوگئے۔ بین الاقوامی میڈیا کے مطابق حکام نے حادثے کی وجوہات جاننے کے لیے تحقیقات کا آغاز کر دیا ہے۔

Footage shows firefighters dousing the wreckage of a crashed tourist aircraft in southern Peru. Police said the plane was carrying 13 people when it went down while flying over the ancient archaeological site of the Nazca Lines. pic.twitter.com/qqIRZk2lgN

— Al Jazeera English (@AJEnglish) August 2, 2026

بین الاقوامی میڈیا رپورٹس کے مطابق حادثہ جنوبی پیرو کے شہر پسکو کے قریب پیش آیا، جہاں سے طیارے نے نازکا لائنز کی فضائی سیر کے لیے مقامی وقت کے مطابق دوپہر ایک بجے کے کچھ دیر بعد پرواز بھری تھی۔

حکام کا کہنا ہے کہ طیارہ اڑان بھرنے کے فوراً بعد حادثے کا شکار ہوگیا، جس کے نتیجے میں سوار تمام 13 افراد جان کی بازی ہار گئے۔ ہلاک ہونے والوں میں 11 مسافر اور عملے کے 2 ارکان شامل ہیں۔

یہ بھی پڑھیں:روس کے مشرق بعید میں لاپتا ہونے والا مسافر طیارہ تباہ، ملبہ مل گیا

پیرو کے متعلقہ حکام کے مطابق جائے حادثہ سے شواہد اکٹھے کیے جا رہے ہیں، جبکہ حادثے کی اصل وجہ معلوم کرنے کے لیے باضابطہ تحقیقات شروع کر دی گئی ہیں۔ تاحال حادثے کی وجوہات کے بارے میں کوئی حتمی بیان جاری نہیں کیا گیا۔