آزاد جموں و کشمیر کے عام انتخابات کے سلسلے میں مہاجرین جموں و کشمیر کی نشست ایل اے 41 کشمیر ویلی-II کے لیے پولنگ کا عمل شروع ہو گیا ہے۔ پاکستان مسلم لیگ (ن) کے امیدوار ناصر حسین ڈار نے اپنی فیملی کے ہمراہ ووٹ کاسٹ کرنے کے بعد انتخابی عمل پر اطمینان کا اظہار کیا۔
پاکستان مسلم لیگ (ن) کے امیدوار ناصر حسین ڈار نے شیرانوالہ گیٹ کے پولنگ اسٹیشن پر اپنی فیملی کے ہمراہ ووٹ کاسٹ کیا۔ اس موقع پر انہوں نے کہا کہ پولنگ کا عمل پرامن انداز میں جاری ہے اور ووٹرز اطمینان کے ساتھ اپنے حق رائے دہی کا استعمال کر رہے ہیں۔
ناصر حسین ڈار نے سیکیورٹی انتظامات کو بھی سراہتے ہوئے کہا کہ قانون نافذ کرنے والے اداروں کے اہلکار اپنے فرائض احسن طریقے سے انجام دے رہے ہیں، جس کے باعث پولنگ کا ماحول پرامن ہے۔ انہوں نے امید ظاہر کی کہ ووٹنگ کا عمل دن بھر اسی طرح خوش اسلوبی سے جاری رہے گا۔
مسلم لیگ (ن) کے امیدوار نے دعویٰ کیا کہ اب تک ڈالے جانے والے ووٹوں کا رجحان مسلم لیگ (ن) کے حق میں ہے۔ انہوں نے کہا کہ اس دفعہ تیر کو زنگ لگ چکا ہے اور آج پاکستان بھر میں شیر کامیابی حاصل کرے گا۔
ناصر حسین ڈار نے کہا کہ کشمیری مہاجرین اپنی بقا اور اپنے حقوق کے تحفظ کے لیے مسلم لیگ (ن) کو ووٹ دے رہے ہیں۔ ان کا کہنا تھا کہ مہاجرین کے ووٹوں کا تحفظ مسلم لیگ (ن) کی اولین ترجیح ہے اور ان کے ووٹ کسی صورت ضائع نہیں ہونے دیے جائیں گے۔
انہوں نے مزید کہا کہ مسلم لیگ (ن) کا منشور مہاجرین جموں و کشمیر کے آئینی اور جمہوری حقوق کے تحفظ پر مبنی ہے۔ ناصر حسین ڈار نے مقبوضہ کشمیر کی صورتحال کا حوالہ دیتے ہوئے کہا کہ مودی نے کشمیر میں جو کیا وہ کسی سے ڈھکا چھپا نہیں۔
