آزاد جموں و کشمیر قانون ساز اسمبلی کے انتخابات کے دوسرے مرحلے میں وادی کشمیر کی پانچ نشستوں کے غیر حتمی اور غیر سرکاری نتائج سامنے آ گئے ہیں، جن کے مطابق پاکستان مسلم لیگ (ن) نے 3 جبکہ پاکستان پیپلز پارٹی نے 2 نشستوں پر کامیابی حاصل کر لی ہے۔
غیر حتمی اور غیر سرکاری نتائج کے مطابق حلقہ ایل اے 39 ویلی ون سے پاکستان پیپلز پارٹی کے امیدوار عامر غفار لون بھاری اکثریت سے کامیاب ہوگئے۔
حلقہ ایل اے 42 ویلی 3 سے پاکستان مسلم لیگ (ن) کے امیدوار سید شوکت بھاری اکثریت سے کامیاب ہو گئے، جبکہ پاکستان پیپلز پارٹی کے امیدوار عاصم بٹ دوسرے نمبر پر رہے۔
حلقہ ایل اے 43 ویلی فور میں پاکستان مسلم لیگ (ن) کے امیدوار محمد یاسین لون نے پاکستان پیپلز پارٹی کے امیدوار جاوید بٹ کو شکست دے کر کامیابی حاصل کی۔
اسی طرح حلقہ ایل اے 44 ویلی فائیو سے پاکستان مسلم لیگ (ن) کے امیدوار احمد رضا قادری تقریباً 1700 ووٹوں کی برتری سے کامیاب قرار پائے، جبکہ مسلم کانفرنس کی امیدوار مہر النسا 650 ووٹ حاصل کرکے دوسرے نمبر پر رہیں۔
ادھر حلقہ ایل اے 45 ویلی 6 سے بھی غیر حتمی اور غیر سرکاری نتائج کے مطابق پاکستان پیپلز پارٹی کے امیدوار عبدالماجد خان بھاری اکثریت سے کامیاب ہو گئے۔
وادی کشمیر کی ان 5 نشستوں کے غیر حتمی نتائج کے بعد پاکستان مسلم لیگ (ن) نے 3 جبکہ پاکستان پیپلز پارٹی نے دو نشستیں اپنے نام کر لی ہیں، جس کے بعد انتخابی مقابلہ مزید دلچسپ ہو گیا ہے۔
دیگر حلقوں کے غیر حتمی اور سرکاری نتائج بھی مرحلہ وار جاری کیے جا رہے ہیں، جبکہ الیکشن کمیشن کی جانب سے تمام نتائج کی باضابطہ تصدیق کا عمل جاری ہے۔
