چین کے شمال مشرقی صوبے ہیلونگ جیانگ میں سیلابی موسم شدت اختیار کرنے کے بعد حکومت نے بچاؤ اور حفاظتی اقدامات میں تیزی کر دی ہے، جبکہ مرکزی حکومت نے متاثرہ علاقوں کی بحالی کے لیے 5 کروڑ یوآن (تقریباً 73 لاکھ 60 ہزار امریکی ڈالر) کے خصوصی فنڈز بھی مختص کر دیے ہیں۔
چین کے شمال مشرقی صوبے ہیلونگ جیانگ میں سیلاب کے خطرات کے پیشِ نظر مختلف شہروں اور دیہات میں ہنگامی حفاظتی اقدامات جاری ہیں۔ حکام نے دریاؤں کے پشتوں کو مضبوط بنانے، ریت سے بھرے تھیلے نصب کرنے، پانی کی سطح کی مسلسل نگرانی اور متاثرہ علاقوں میں گشت بڑھانے سمیت متعدد اقدامات کیے ہیں۔
یہ بھی پڑھیں:چین میں سیلاب کے باعث تقریباً 900 سانپ فرار، سرچ آپریشن جاری
صوبے کے شہر تونگ جیانگ، جیا موسی، سوئی ہوا اور دیگر علاقوں میں کارکن پشتوں کی مضبوطی، عارضی حفاظتی بند تعمیر کرنے اور سیلابی پانی کے ممکنہ دباؤ سے نمٹنے کے لیے سرگرم ہیں۔ متعدد بندرگاہوں اور حساس تنصیبات کو بھی ریت کے تھیلوں کے ذریعے محفوظ بنایا گیا ہے۔
دوسری جانب چین کے نیشنل ڈیولپمنٹ اینڈ ریفارم کمیشن (این ڈی آر سی) نے ہیلونگ جیانگ میں سیلاب سے متاثرہ علاقوں کی بحالی اور بنیادی ڈھانچے کی مرمت کے لیے مرکزی حکومت کی جانب سے 5 کروڑ یوآن کے فنڈز مختص کیے ہیں۔
Today, severe flooding triggered by heavy rainfall inundated homes and swept away multiple vehicles in Zigui County, Yichang, Hubei Province, China. pic.twitter.com/V3eXgI4bZo
— Weather Monitor (@WeatherMonitors) August 5, 2026
حکام کے مطابق یہ فنڈز سڑکوں، پشتوں، آبی ڈھانچے اور دیگر عوامی سہولیات کی بحالی پر خرچ کیے جائیں گے تاکہ متاثرہ علاقوں میں معمولاتِ زندگی جلد از جلد بحال کیے جا سکیں۔
مقامی انتظامیہ نے نشیبی علاقوں میں نگرانی مزید سخت کر دی ہے اور امدادی سامان، مشینری اور اہلکاروں کو ہائی الرٹ رکھا گیا ہے تاکہ کسی بھی ہنگامی صورتحال سے فوری طور پر نمٹا جا سکے۔ چین میں اس وقت سیلابی موسم اپنے عروج پر ہے، جس کے باعث مختلف علاقوں میں حفاظتی انتظامات مزید مؤثر بنائے جا رہے ہیں۔
