نائب وزیراعظم و وزیر خارجہ اسحاق ڈار نے آسیان کے 59ویں یومِ تاسیس کے موقع پر جنوب مشرقی ایشیائی ممالک کے ساتھ پاکستان کی دیرینہ دوستی اور شراکت داری کو مزید مضبوط بنانے کے عزم کا اعادہ کیا ہے۔
نائب وزیراعظم و وزیر خارجہ نے پاکستان کی حکومت اور عوام کی جانب سے آسیان کے رکن ممالک کی حکومتوں اور عوام کو 59ویں سالگرہ پر مبارکباد اور نیک خواہشات پیش کیں۔ انہوں نے آسیان کے سیکریٹری جنرل ڈاکٹر کاؤ کم ہورن کو بھی خطے میں علاقائی تعاون، استحکام اور خوشحالی کے فروغ کے لیے مثالی قیادت اور مسلسل کوششوں پر مبارکباد دی۔
اسحاق ڈار نے کہا کہ آسیان ڈے جنوب مشرقی ایشیا کی اقوام کو متحد کرنے والے اتحاد، یکجہتی اور تعاون کے جذبے کی عکاسی کرتا ہے۔ پاکستان اس اہم موقع پر اپنے آسیان دوستوں کے ساتھ اظہار یکجہتی کرتے ہوئے خطے کے ساتھ دیرینہ دوستی اور شراکت داری کی تجدید کرتا ہے۔
🔈 PR No. 2️⃣0️⃣6️⃣/2️⃣0️⃣2️⃣6️⃣
Message by the Deputy Prime Minister/Foreign Minister, Senator Mohammad Ishaq Dar @MIshaqDar50, on ASEAN Day (8 August 2026)
🔗⬇️ pic.twitter.com/XSyT3q6sJZ
— Ministry of Foreign Affairs – Pakistan (@ForeignOfficePk) August 8, 2026
انہوں نے کہا کہ آسیان علاقائی انضمام اور اجتماعی ترقی کا ایک نمایاں نمونہ ہے، جس نے اقتصادی ترقی، سماجی ہم آہنگی اور سفارتی روابط کے شعبوں میں اہم کامیابیاں حاصل کی ہیں۔ پاکستان ایشیا بحرالکاہل کے خطے میں امن، استحکام اور خوشحالی کے فروغ میں آسیان کے اہم کردار کو قدر کی نگاہ سے دیکھتا ہے۔
نائب وزیراعظم کے مطابق پاکستان اور آسیان کے تعلقات باہمی احترام، عدم مداخلت اور تعمیری روابط کے مشترکہ اصولوں پر استوار ہیں۔ پاکستان نے آسیان کے ساتھ مکالمے کے مختلف طریقہ کار میں فعال کردار ادا کیا ہے اور تجارت، سرمایہ کاری، تعلیم، ثقافت اور عوامی روابط سمیت باہمی دلچسپی کے شعبوں میں تعاون مزید بڑھانے کے لیے پرعزم ہے۔
انہوں نے کہا کہ پاکستان آسیان ریجنل فورم میں بھی فعال طور پر شریک ہے، جہاں وہ علاقائی امن، سلامتی اور تعاون کے فروغ کے لیے اجتماعی کوششوں میں اپنا کردار ادا کر رہا ہے۔
یہ بھی پڑھیں:مسئلہ کشمیر کا منصفانہ حل جنوبی ایشیا میں پائیدار امن کی بنیاد ہے، اسحاق ڈار کا آسیان فورم سے خطاب
اسحاق ڈار نے کہا کہ بڑھتے ہوئے عالمی چیلنجز اور غیر یقینی صورتحال کے دور میں آسیان کا اتحاد، مکالمے، باہمی مفاہمت اور پرامن تعاون کے لیے عزم قابل تحسین ہے۔ پاکستان کا پختہ یقین ہے کہ جامع مکالمہ، باہمی اعتماد اور عالمی تعاون مشترکہ چیلنجز سے نمٹنے کا مؤثر ترین ذریعہ ہیں۔
انہوں نے کہا کہ پاکستان آسیان کی جانب سے علاقائی امن، استحکام، خوشحالی اور پائیدار ترقی کے لیے جاری کوششوں کی مکمل حمایت کرتا ہے اور ایک پرامن، خوشحال اور مربوط خطے کے مشترکہ وژن کے حصول کے لیے آسیان کے ساتھ قریبی تعاون جاری رکھے گا۔
