وزیراعظم پاکستان شہباز شریف دورہ سعودی عرب مکمل کرنے کے بعد وطن واپس پہنچ گئے ہیں۔
وزیراعظم شہباز شریف نے دورہ سعودی عرب مکمل کرنے کے بعد مدینہ منورہ سے پاکستانی وفد کے ہمراہ وطن واپسی کا سفر شروع کیا اور اب پاکستان پہنچ گئے ہیں۔
وطن واپسی سے قبل وزیراعظم شہباز شریف نے پاکستانی وفد کے ہمراہ مسجد نبویﷺ میں حاضری دی۔
وزیراعظم نے ریاض الجنہ میں نوافل ادا کیے اور ملک و قوم کی ترقی و خوشحالی کے لیے دعا کی۔
وزیراعظم شہباز شریف نے روضہ رسول صلی اللہ علیہ وسلم پر بھی حاضری دی، جہاں انہیں زیارت خاص کی سعادت حاصل ہوئی۔
مدینہ ایئرپورٹ پر گورنر مدینہ شہزادہ سلمان بن سلطان بن عبدالعزیز آل سعود نے وزیراعظم شہباز شریف اور پاکستانی وفد کو الوداع کیا۔
وزیراعظم شہباز شریف کے ہمراہ نائب وزیراعظم و وزیر خارجہ سینیٹر محمد اسحاق ڈار، وفاقی وزیر دفاع خواجہ محمد آصف، وزیر اطلاعات و نشریات عطااللہ تارڑ اور معاون خصوصی طارق فاطمی بھی تھے۔
واضح رہے کہ وزیراعظم پاکستان شہباز شریف وفد کے ہمراہ سعودی عرب کے خصوصی دورے پر روانہ ہوئے تھے، جہاں سعودی عرب، پاکستان اور ترکیہ نے مشترکہ دفاعی معاہدے پر دستخط کیے۔
