وزیراعلیٰ پنجاب مریم نواز نے اعلان کیا ہے کہ لاہور میں بسنت کا 3 روزہ جشن 12 سے 14 مارچ 2027 تک منایا جائے گا۔
مریم نواز نے سماجی رابطے کی ویب سائٹ پر اپنے پیغام میں کہا کہ لاہور ایک بار پھر رنگوں، ثقافت، جشن، موسیقی، توانائی اور اپنی روایتی مہمان نوازی سے بھر جائے گا۔
یہ بھی پڑھیں: لاہور: 2027 کی 3 روزہ بسنت اور جشنِ بہاراں کی تاریخوں کا باقاعدہ اعلان کردیا گیا
انہوں نے پنجاب اور پاکستان کے نوجوانوں کو بسنت میں شرکت کی دعوت دیتے ہوئے کہا کہ نوجوان ایک ساتھ مل کر یادگار لمحات بنائیں اور اپنی توانائی و جذبے سے لاہور کو جگمگائیں۔
وزیراعلیٰ نے بیرون ملک مقیم پاکستانیوں اور غیر ملکی مہمانوں سے بھی کہا کہ وہ اپنی تاریخیں محفوظ کرلیں اور لاہور کے رنگوں اور جشن سے لطف اندوز ہونے کیلئے وطن آئیں۔
🇵🇰 BIG ANNOUNCEMENT FOR PAKISTAN & THE WORLD! 🇵🇰
After successful Basant 2026, I am proud and happy to announce Basant Lahore 2027! 🪁❤️
📅 12, 13 & 14 March 2027
Lahore will once again come alive with color, culture, festivity, music, energy and legendary hospitality. 🎉🪁… pic.twitter.com/Tx7WGGeEKs
— Maryam Nawaz Sharif (@MaryamNSharif) August 18, 2026
واضح رہے کہ پنجاب حکومت نے دسمبر 2025 میں 18 سال سے عائد بسنت پر پابندی ختم کردی تھی، تاہم پتنگ بازی کیلئے سخت ضوابط مقرر کیے گئے تھے۔
یہ بھی پڑھیں: بسنت کے دوران اخراجات، لاہور پولیس نے پنجاب حکومت سے کروڑوں روپے طلب کرلیے
بسنت پر 2007 میں پابندی عائد کی گئی تھی۔ اس کی بنیادی وجوہات میں دھاتی اور خطرناک ڈور سے موٹر سائیکل سواروں اور دیگر افراد کے زخمی اور ہلاک ہونے کے واقعات کے ساتھ ہوائی فائرنگ بھی شامل تھی۔
پنجاب حکومت نے آئندہ سال بسنت کے دوران پتنگ بازی کیلئے نئے قواعد و ضوابط بھی جاری کیے ہیں۔ ان قواعد کے تحت چھتوں پر دوڑنے، چھلانگ لگانے اور کناروں سے لٹکنے پر پابندی ہوگی، جبکہ چھتوں پر گنجائش سے زیادہ افراد جمع کرنے کی بھی اجازت نہیں ہوگی۔
قواعد کے مطابق پتنگ بازی کی تقریبات کے منتظمین ہجوم کے انتظام کے ذمہ دار ہوں گے۔ بلند آواز میں موسیقی، ڈھول یا ایسے صوتی آلات کے استعمال پر بھی پابندی ہوگی جن سے شور یا عوامی سکون میں خلل پڑے۔
یہ بھی پڑھیں: پتنگوں کی اڑان اور خوشیوں کی گونج، کوئٹہ میں بسنت کی دھوم
عوامی نظم و ضبط برقرار رکھنے کیلئے کسی بھی قسم کی بدتمیزی، ہراسانی، فحش حرکات یا پڑوسیوں اور عام شہریوں کیلئے خلل کا باعث بننے والے اقدامات کو بھی ممنوع قرار دیا گیا ہے۔
پتنگ بازی کی تقریبات کے مقامات پر ابتدائی طبی امداد کی کٹس کی دستیابی بھی لازمی قرار دی گئی ہے، جبکہ حادثے یا خلاف ورزی کی صورت میں عمارت کے مالکان اور تقریب کے منتظمین کو ذمہ دار ٹھہرایا جائے گا۔
بسنت موسم بہار کی آمد، خوشحالی اور اچھی فصل کی امید سے منسلک تہوار ہے۔ لاہور میں بسنت اور پتنگ بازی کی روایت تاریخی طور پر خاص اہمیت رکھتی ہے اور وقت کے ساتھ یہ جشن پنجاب کے دیگر علاقوں سمیت ملک کے مختلف حصوں میں بھی مقبول ہوا۔
