برطانیہ کے ارل چارلس اسپنسر نے اعلان کیا ہے کہ وہ اپنی مرحوم بہن شہزادی ڈیانا پر ایک نئی کتاب شائع کریں گے۔ Swan Song: Diana, My Sister کے عنوان سے یہ کتاب رواں سال 22 ستمبر کو برطانیہ میں منظرِ عام پر آئے گی۔ ناشر پینگوئن مائیکل جوزف کے مطابق یہ پہلی مرتبہ ہوگا کہ اسپنسر اپنی بہن کے بارے میں تفصیل اور کھل کر گفتگو کر رہے ہیں۔
چارلس اسپنسر نے کہا کہ شہزادی ڈیانا کی المناک موت کی 30 ویں برسی قریب آنے کے باعث انہیں ایک بار پھر اپنی بہن سے متعلق انٹرویوز کے لیے متعدد درخواستیں موصول ہو رہی تھیں، جس نے انہیں اپنی یادیں اور خیالات خود قلم بند کرنے پر آمادہ کیا۔
یہ بھی پڑھیے شہزادہ چارلس اور شہزادی ڈیانا کے ہنی مون کی تلخ یادیں سامنے آگئیں
ان کے مطابق وہ دوسروں کی ایسی آرا پڑھنے کی زحمت سے بچنا چاہتے تھے جو وقت گزرنے کے ساتھ حقائق کے بجائے غلط معلومات پر مبنی روایات بن چکی ہیں۔
اسپنسر نے کہا کہ کتاب کا مقصد بھائی کی حیثیت سے ڈیانا کے بارے میں حقیقت بیان کرنا ہے، بالکل اسی طرح جیسے انہوں نے 1997 میں ان کی آخری رسومات کے موقع پر تقریر کرتے ہوئے کیا تھا۔
انہوں نے کہا کہ وہ ڈیانا کی نمائندگی مثبت انداز میں کرنا چاہتے ہیں اور دنیا کو یہ بتانا چاہتے ہیں کہ وہ محبت، کشش، خود اعتمادی کی کمی اور بے مثال شخصیت رکھنے والی ایک منفرد خاتون تھیں جنہوں نے اپنی زندگی بھرپور انداز میں گزاری۔
یہ بھی پڑھیے لیڈی ڈیانا اپنے چھوٹے بیٹے ہیری کے لیے فکرمند کیوں رہتی تھیں؟
چارلس اسپنسر نے ستمبر 1997 میں ویسٹ منسٹر ایبی میں اپنی بہن کی آخری رسومات کے دوران جذباتی تعزیتی خطاب کیا تھا۔ کتاب کے ناشر ڈینیئل بنیئرڈ کے مطابق اس میں کئی ایسے انکشافات شامل ہیں جو خاصی توجہ حاصل کریں گے، تاہم یہ کتاب شہزادی ڈیانا کی یاد کو خراجِ عقیدت بھی پیش کرے گی۔
