پاکستان کے سابق کپتان سلمان بٹ نے انگلینڈ کے سابق فاسٹ بولر اسٹورٹ براڈ کے پاکستان کرکٹ ٹیم سے متعلق حالیہ بیان پر سخت ردعمل دیتے ہوئے ان کے الفاظ کے انتخاب پر سوال اٹھا دیا ہے۔
یہ بھی پڑھیں: انگلینڈ کے آل راؤنڈر ول جیکس اپینڈکس کی سرجری کے باعث پاکستان کے خلاف ٹیسٹ سیریز سے باہر
اسٹورٹ براڈ نے انگلینڈ اور پاکستان کے درمیان جاری 3 ٹیسٹ میچوں کی سیریز کے دوران پاکستانی ٹیم کی موجودہ کارکردگی پر تبصرہ کرتے ہوئے اسے بہت کمزور ٹیم قرار دیا تھا۔ ان کا کہنا تھا کہ اگر انگلینڈ موجودہ سیریز جیتنے میں ناکام رہتا ہے تو یہ میزبان ٹیم کے لیے ایک بڑی ناکامی ہوگی۔
براڈ نے کہا تھا کہ پاکستان ایک کمزور ٹیم ہے اور اس میں کوئی شک نہیں، جبکہ انہوں نے اسے بہت خراب ٹیم بھی قرار دیا۔ ان کے مطابق انگلینڈ کے لیے پاکستان کے خلاف ٹیسٹ سیریز میں فتح حاصل کرنا ضروری ہے۔
سلمان بٹ نے پاکستان کی موجودہ ٹیسٹ کارکردگی کو تسلیم کرتے ہوئے کہا کہ قومی ٹیم اس فارمیٹ میں اپنی صلاحیت کے مطابق کھیل پیش نہیں کر رہی، تاہم انہوں نے براڈ کی جانب سے پاکستان کو بہت کمزور ٹیم قرار دینے پر اعتراض کیا۔
سلمان بٹ نے کہا کہ اگر پاکستانی ٹیم اس وقت اچھی کرکٹ نہیں کھیل رہی تو یہ بات اپنی جگہ درست ہے لیکن اسے کمزور ٹیم قرار دینا مناسب نہیں۔ انہوں نے اسٹورٹ براڈ کو انگلینڈ کی آسٹریلیا کے خلاف ٹیسٹ سیریز میں کارکردگی یاد دلاتے ہوئے کہا کہ انگلینڈ جب آسٹریلیا جاتا ہے تو وہاں اسے اکثر مشکلات کا سامنا کرنا پڑتا ہے۔
مزید پڑھیے: ہیڈنگلے ٹیسٹ پر بارش کا خطرہ، پاکستان اور انگلینڈ کل پہلے میچ میں آمنے سامنے
سابق کپتان کا کہنا تھا کہ انگلینڈ کے پاس ایک اچھی ٹیم موجود ہے لیکن سوال یہ ہے کہ آسٹریلیا کے دوروں پر اس کی کارکردگی کیا ہوتی ہے۔ انہوں نے کہا کہ انگلینڈ کو وہاں کئی مرتبہ 5 صفر سے شکست کا سامنا کرنا پڑا لیکن پاکستان کے کسی کھلاڑی نے اس بنیاد پر انگلینڈ کو بہت خراب ٹیم قرار نہیں دیا۔
’ہماری ٹیم اچھی بولنگ کرتی تھی تو انگلینڈ کے پاس کیا تھا؟‘
سلمان بٹ نے ماضی میں پاکستان کے مضبوط فاسٹ بولنگ اٹیک کا حوالہ دیتے ہوئے کہا کہ جب پاکستان کے پاس ایک بہترین بولنگ اٹیک موجود تھا اس وقت انگلینڈ کی ٹیم میں ایسے بولرز بھی تھے جو تقریباً 120 کلومیٹر فی گھنٹہ کی رفتار سے گیند کراتے تھے، لیکن پاکستانی کھلاڑیوں نے کبھی انگلینڈ کو بہت خراب ٹیم قرار نہیں دیا۔
انہوں نے کہا کہ یہ طرزِ فکر درست نہیں اور انگلینڈ کے سابق اور موجودہ کھلاڑیوں کو پاکستان پر تنقید کرنے کے بجائے اپنی ٹیم کی بیرونِ ملک کارکردگی کا بھی جائزہ لینا چاہیے۔
مزید پڑھیں: انگلینڈ کا پاکستان کو 171 رنز پر آؤٹ کرنے کے بعد پہلے ٹیسٹ میں محتاط آغاز
سلمان بٹ نے زور دیا کہ پاکستان کی موجودہ ٹیسٹ کارکردگی پر تنقید کی جاسکتی ہے تاہم کسی ٹیم کو اس طرح کے الفاظ میں بیان کرنے سے پہلے خود انگلینڈ کی بیرونِ ملک کارکردگی کو بھی مدنظر رکھنا چاہیے۔
