پشتونخوا ملی عوامی پارٹی کے چیئرمین محمود خان اچکزئی کی جانب سے کوئٹہ میں پشتونوں کا قومی جرگہ بلانے کے اعلان پر جمعیت علمائے اسلام بلوچستان کے امیر مولانا عبدالواسع نے تحفظات کا اظہار کردیا۔
مولانا عبدالواسع نے کہا ہے کہ موجودہ حالات میں پشتونخوا ملی عوامی پارٹی کی جانب سے آل پارٹیز کانفرنس کے بجائے صرف پشتون جرگہ بلانا افسوسناک ہے۔ بلوچستان کے مسائل کسی ایک قوم یا علاقے تک محدود نہیں بلکہ صوبے کی تمام اقوام اور سیاسی جماعتیں ان حالات سے متاثر ہیں۔
انہوں نے کہا کہ صوبے میں امن و امان، سیاسی صورت حال اور عوامی مسائل کے حل کے لیے وسیع تر سیاسی مشاورت کی ضرورت ہے، اس لیے تمام سیاسی جماعتوں کو ساتھ لے کر آل پارٹیز کانفرنس کا انعقاد زیادہ مؤثر فورم ہوسکتا ہے۔
محمود خان اچکزئی نے اس سے قبل کوئٹہ میں پشتونوں کا قومی جرگہ بلانے کا اعلان کیا تھا، جس کا مقصد موجودہ حالات اور پشتون قوم کو درپیش مسائل پر مشاورت اور آئندہ کا لائحہ عمل طے کرنا بتایا گیا ہے۔
یہ بھی پڑھیں:اپوزییشن، گیدڑ، ملنگ، ڈمی اپوزیشن لیڈر محمود خان اچکزئی کی وی ٹو میں گفتگو
تجزیہ نگاروں کا موقف ہے کہ سیاسی طور پر دیکھا جائے تو محمود خان اچکزئی اور مولانا عبدالواسع کے مؤقف میں فرق محض جرگے یا کانفرنس کے انعقاد کا نہیں بلکہ مسائل کے سیاسی دائرہ کار کا ہے۔ محمود خان اچکزئی پشتون علاقوں کے مسائل کو مرکز بنا کر اجتماعی جرگے کی بات کر رہے ہیں، جبکہ مولانا عبدالواسع بلوچستان کے مسائل کو تمام اقوام اور سیاسی جماعتوں کا مشترکہ مسئلہ قرار دے رہے ہیں۔
یہ بیان اس لحاظ سے اہم ہے کہ دونوں سیاسی قوتیں بلوچستان کی سیاست میں اثر و رسوخ رکھتی ہیں۔ اگر پشتون جرگے اور آل پارٹیز کانفرنس کے معاملے پر سیاسی جماعتوں کے درمیان اتفاق نہ ہوا تو یہ آئندہ بلوچستان میں اپوزیشن کی مشترکہ سیاسی حکمت عملی کے لیے بھی ایک چیلنج بن سکتا ہے۔ دوسری جانب، اگر دونوں تجاویز کو یکجا کرکے پہلے آل پارٹیز مشاورت اور اس کے بعد جرگے کا راستہ نکالا جاتا ہے تو ایک وسیع تر سیاسی اتفاقِ رائے کی گنجائش پیدا ہوسکتی ہے۔
