پاکستانی شوبز انڈسٹری کی سینئر اداکارہ حمیرا بانو رشتۂ ازدواج میں منسلک ہوگئیں۔ اداکارہ نے اپنی شادی کی خوشخبری سوشل میڈیا پر مداحوں کے ساتھ شیئر کردی۔
حمیرا بانو نے اپنے آفیشل انسٹاگرام اکاؤنٹ پر شوہر کے ہمراہ تصاویر پوسٹ کرتے ہوئے زندگی کے نئے سفر کا اعلان کیا۔ ان تصاویر میں انہوں نے اپنے شوہر کا چہرہ کیمرے میں نہیں دکھایا بلکہ شوہر کی پشت نظر آرہی ہے۔
یہ بھی پڑھیں: وہ پاکستانی ستارے جن کا آخری وقت دلخراش رہا
تصاویر کے ساتھ شیئر کیے گئے پیغام میں اداکارہ نے لکھا ’کبھی کبھی ہم اپنے لیے کچھ اور منصوبہ بناتے ہیں لیکن اللہ ہمارے لیے کچھ اور طے کر چکا ہوتا ہے۔ جب رب ’کُن‘ فرما دے تو پھر منزل آسان ہو جاتی ہے‘۔
View this post on Instagram
حمیرا بانو طویل عرصے سے پاکستانی ڈرامہ انڈسٹری سے وابستہ ہیں اور امید، مہرپوش، میرا رب وارث، ملالِ یار، ڈولی ڈارلنگ، میرے اپنے، بے نام، بنو اور دیوانگی سمیت متعدد مقبول ڈراموں میں اداکاری کے جوہر دکھا چکی ہیں۔
یہ بھی پڑھیں: مقبول ڈرامہ سیریل ’محروم‘ کے اختتام سے مداح مایوس کیوں؟
اداکارہ کو بالخصوص ماں کے کرداروں میں جاندار اداکاری کے باعث ناظرین میں خاص مقبولیت حاصل ہے۔ حالیہ ڈرامہ ملکیت میں بھی ان کی اداکاری کو سراہا گیا جبکہ وہ گرین انٹرٹینمنٹ کے سیریل انتخاب میں بھی اہم کردار ادا کر رہی ہیں۔
حمیرا بانو کی شادی کی خبر سامنے آنے کے بعد شوبز سے وابستہ ساتھیوں اور دوستوں کی جانب سے انہیں مبارکباد دینے کا سلسلہ جاری ہے۔ مایا خان، سباحت بخاری، منسا ملک اور عرفان موری والا سمیت متعدد شخصیات نے اداکارہ کے لیے نیک خواہشات کا اظہار کیا۔
