پاکستان تحریک انصاف (پی ٹی آئی) کے بانی رہنما اکبر ایس بابر نے 27 ستمبر کے مجوزہ لانگ مارچ کے لیے پارٹی کی جانب سے شروع کی گئی چندہ مہم پر دلچسپ انداز میں شدید تنقید کی ہے۔
سماجی رابطے کی ویب سائٹ ایکس (سابقہ ٹوئٹر) پر اپنے پیغام میں انہوں نے پی ٹی آئی کی موجودہ قیاد ت کو ‘خود ساختہ’ قرار دیتے ہوئے عوام اور کارکنان کو محتاط رہنے کا مشورہ دیا ہے۔
اکبر ایس بابر کا کہنا تھا کہ ماضی کے تلخ تجربات اور فنڈز کے مبہم استعمال کو مدنظر رکھتے ہوئے اس بار چندہ دینے والوں کو رقم جمع کروانے سے پہلے ‘منی بیک گارنٹی’ (Money Back Guarantee) کا قانونی بیان حلفی لازمی طلب کرنا چاہیے۔
یہ بھی پڑھیے لانگ مارچ کے لیے پی ٹی آئی کی چندہ مہم، پشاور کے شہری کیا کہتے ہیں؟
انہوں نے مزید کہا کہ اس بیان حلفی میں یہ ضمانت شامل ہونی چاہیے کہ اگر 27 ستمبر کا لانگ مارچ کسی بھی وجہ یا حالات کی تبدیلی (overtaken by events) کے باعث منسوخ ہوتا ہے تو تمام جمع شدہ رقم عطیہ دہندگان کو واپس کی جائے گی۔
اپنے پیغام کے اختتام پر انہوں نے تنبیہی انداز میں لکھا، ’پھر نہ کہنا خبر نہ ہوئی۔‘
27 ستمبر کے لانگ مارچ کے لئے پی ٹی آئی کی خود ساختہ قیادت کی نئی “چندہ” مہم۔
ماضی کے تلخ تجربات کے پیش نظر “چندہ” دینے والوں کو “چندہ” لینے والوں سے بیان حلفی لینا چاہیے کہ لانگ مارچ کی منسوخی(overtaken by events) کی صورت میں رقم واپس کر دی جائے گی۔
پھر نہ کہنا خبر نہ ہوئی!!!
— Akbar S. Babar PTI (@asbabar786) August 31, 2026
واضح رہے کہ پاکستان تحریک انصاف نے 27 ستمبر کو اسلام آباد کی طرف ممکنہ لانگ مارچ اور احتجاجی سیاست کے سلسلے میں مالی وسائل اکٹھے کرنے کے لیے باقاعدہ طور پر ایک نئی چندہ مہم کا آغاز کیا ہے۔
پارٹی کی جانب سے اپنے ملکی و غیر ملکی کارکنان اور حامیوں سے اپیل کی گئی ہے کہ وہ مارچ کے انتظامات، ترسیل اور لاجسٹکس کے اخراجات پورے کرنے کے لیے زیادہ سے زیادہ مالی تعاون کریں۔ تاہم، پی ٹی آئی کے اندرونی مخالفین اور سیاسی حریف ماضی میں اکٹھے کیے گئے فنڈز کی شفافیت پر سوال اٹھاتے رہے ہیں، جس کے بعد اکبر ایس بابر کی جانب سے یہ نیا موقف سامنے آیا ہے۔
