ملک میں گندم کی دستیابی اور قیمتوں میں استحکام یقینی بنانے کے لیے وفاقی حکومت نے اہم فیصلے کرلیے ہیں، نائب وزیراعظم محمد اسحاق ڈار نے پاسکو کو صوبوں کو فوری طور پر گندم فراہم کرنے کی ہدایت کرتے ہوئے پہلے مرحلے میں ڈھائی لاکھ میٹرک ٹن گندم درآمد کرنے کا عمل شروع کرنے کا حکم دے دیا۔
جمعرات کے روز نائب وزیراعظم و وزیر خارجہ سینیٹر اسحاق ڈار کی زیر صدارت ملک میں گندم کے ذخائر اور دستیابی کا جائزہ لینے کے لیے اجلاس ہوا۔
یہ بھی پڑھیں: حکومت کا ایک ملین میٹرک ٹن گندم درآمد کرنے کا فیصلہ، ٹی سی پی کو تیاریوں کی ہدایت
اجلاس میں گندم کی درآمد، قیمتوں میں استحکام اور ذخیرہ اندوزی کی روک تھام سے متعلق امور کا جائزہ لیا گیا۔ نائب وزیراعظم نے گندم سے متعلق مسائل کے حل میں تمام صوبوں، وزارت قومی غذائی تحفظ و تحقیق اور وزارت تجارت کے تعاون اور رابطہ کاری کو سراہا۔
محمد اسحاق ڈار نے پاسکو کو ہدایت کی کہ اقتصادی رابطہ کمیٹی اور متعلقہ رہنمائی کمیٹی کی منظور شدہ تقسیم کے مطابق صوبوں کو فوری طور پر گندم فراہم کی جائے۔ انہوں نے صوبوں کو بھی ہدایت کی کہ مختص گندم کی بروقت ادائیگی اور اٹھان یقینی بنائی جائے۔
اجلاس میں 10 لاکھ میٹرک ٹن تک گندم درآمد کرنے کے فیصلے کا اعادہ کیا گیا۔ اس سلسلے میں تجارتی کارپوریشن کو فوری طور پر درآمدی عمل شروع کرنے کی ہدایت کی گئی۔ پہلے مرحلے میں 2 لاکھ 50 ہزار میٹرک ٹن گندم درآمد کی جائے گی، جس کی ترسیل نومبر میں مقرر کی گئی ہے۔
یہ بھی پڑھیں: وفاقی حکومت کا ہنگامی اقدام، 10 لاکھ ٹن گندم درآمد کرنے کا فیصلہ
نائب وزیراعظم نے زور دیا کہ تمام متعلقہ ادارے قریبی رابطہ کاری کے ساتھ کام جاری رکھیں تاکہ ملک میں گندم کی وافر دستیابی، قیمتوں میں استحکام اور صارفین کو ریلیف یقینی بنایا جا سکے۔
اجلاس میں وزیر قومی غذائی تحفظ و تحقیق، وزیر تجارت، معاون خصوصی وزیراعظم طارق باجوہ، وزارت تجارت اور وزارت قومی غذائی تحفظ و تحقیق کے سیکریٹریز، صوبائی حکومتوں کے نمائندوں اور وفاقی و صوبائی حکام نے شرکت کی۔
