نائب وزیراعظم و وزیر خارجہ سینیٹر اسحاق ڈار کی زیر صدارت گندم کی درآمد سے متعلق اسٹیئرنگ کمیٹی کا اجلاس ہوا، جس میں ملک میں گندم کی ضروریات اور درآمدی عمل کا جائزہ لیا گیا۔
اجلاس میں تمام صوبوں کی جانب سے گندم کی درآمد سے متعلق ضروریات کا جائزہ لیا گیا۔ نائب وزیراعظم و وزیر خارجہ نے متعلقہ حکام کو ہدایت کی کہ گندم کی مناسب فراہمی اور قیمتوں میں استحکام یقینی بنانے کے لیے ضروری اقدامات کیے جائیں۔
اس موقع پر ٹریڈنگ کارپوریشن آف پاکستان (ٹی سی پی) کو ایک ملین میٹرک ٹن گندم درآمد کرنے کے لیے ضروری تیاریاں شروع کرنے کی ذمہ داری سونپ دی گئی۔
نائب وزیراعظم و وزیر خارجہ اسحاق ڈار نے کہاکہ حکومت ضروری اشیائے خورونوش، بالخصوص گندم کی مناسب فراہمی اور قیمتوں میں استحکام یقینی بنانے کے لیے صوبوں کی معاونت کے عزم پر قائم ہے۔
انہوں نے ہدایت کی کہ گندم کی درآمد کا پورا عمل مکمل شفافیت کے ساتھ اور تمام صوبوں کے ساتھ قریبی رابطے میں مکمل کیا جائے۔
اجلاس میں وفاقی وزیر برائے قومی غذائی تحفظ و تحقیق، وفاقی وزیر اقتصادی امور، وزیراعظم کے معاون خصوصی طارق باجوہ، وزیراعظم کے فوڈ سیکیورٹی کوآرڈینیٹر، وزارت قومی غذائی تحفظ و تحقیق اور وزارت تجارت کے سیکریٹریز سمیت پنجاب، سندھ، بلوچستان اور خیبر پختونخوا کی حکومتوں کے نمائندوں نے شرکت کی۔
