گوگل نے جی میل، ڈاکومینٹس (ڈاکس) اور کیپ میں جدید ترین مصنوعی ذہانت پر مبنی وائس فیچرز متعارف کروا دیے ہیں، جن کی مدد سے صارفین قدرتی زبان اور ڈکٹیشن کے ذریعے ای میلز اور دستاویزات سے متعلق سوالات پوچھ سکیں گے۔
مئی میں منعقدہ گوگل آئی او کانفرنس میں ان فیچرز کی تفصیلات کو پیش کیا گیا تھا، جنہیں اب باضابطہ طور پر لانچ کر دیا گیا ہے۔
جی میل، ڈاکس اور کیپ کے نئے ’لائیو‘ فیچرز کیا ہیں؟
گوگل کی جانب سے ان نئی سہولیات کو بالترتیب ڈاکس لائیو، جی میل لائیو اور کیپ لائیو کا نام دیا گیا ہے۔
جی میل میں صارفین اب سرچ باکس میں ٹائپ کرنے کے بجائے جیمینائی پر مبنی اے آئی اسسٹنٹ سے لائیو ٹرانسکرپٹ کے ساتھ اپنے ان باکس سے متعلق سوالات پوچھ سکیں گے۔
یہ بھی پڑھیں:واٹس ایپ کا گوگل اور ایپل کو ٹکر دینے کا فیصلہ، صارفین کے لیے نئے پرائیویسی فیچرز متعارف
دوسری جانب ’ڈاکس‘ میں صارفین اپنی پسند کی تحریر بول کر بتا سکیں گے، جس پر اے آئی اسسٹنٹ جی میل، ڈرائیو، چیٹ اور ویب سے معلومات اکٹھی کر کے پہلا مسودہ تیار کر دے گا۔
اس کے علاوہ کیپ لائیو کو نوٹ پیڈ کے طور پر استعمال کرتے ہوئے بغیر ٹائپ کیے نوٹس بنائے جا سکیں گے، جو ہدایات ملنے پر ریسیپیز اور مختلف اشیا کی فہرستیں بھی خود بخود تیار کرنے کی صلاحیت رکھتا ہے۔
فیچرز کی دستیابی اور پیکجز
ان جدید فیچرز کی دستیابی کے حوالے سے گوگل نے واضح کیا ہے کہ جی میل لائیو گوگل اے آئی پلس، پرو اور الٹرا صارفین کے لیے فراہم کیا گیا ہے، جبکہ ڈاکس لائیو اور کیپ لائیو گوگل اے آئی پرو اور الٹرا صارفین کے لیے دستیاب ہوں گے۔
یہ تمام فیچرز ابتدائی طور پر آئی او ایس اور اینڈرائیڈ ڈیوائسز پر صرف انگریزی زبان میں پیش کیے جا رہے ہیں۔ کمپنی نے یہ بھی بتایا ہے کہ ان سہولیات کو بہت جلد ورک اسپیس بزنس صارفین کے لیے بھی رول آؤٹ کر دیا جائے گا۔
گوگل کی وائس بیسڈ ٹیکنالوجی
یہ پہلا موقع نہیں ہے جب گوگل نے صوتی ٹیکنالوجی پر مبنی فیچرز پیش کیے ہوں، بلکہ کمپنی طویل عرصے سے اپنی ایپس میں ایسے اسمارٹ ٹولز متعارف کرا رہی ہے۔
مزید پڑھیں:گوگل کی جیمینائی ایپ کی بڑی کامیابی، صارفین کی تعداد 1 ارب سے تجاوز کرگئی
اس سلسلے میں گزشتہ اپریل میں اس نے اپنی میک ایپ میں کراس ایپ ڈکٹیشن کی سہولت شامل کی تھی، جبکہ پکسل 11 اسمارٹ فونز کو گزشتہ ماہ ’ریمبلر‘ نامی جیمینائی بیسڈ ڈکٹیشن ٹول ملا جو بولنے کے دوران غیر ضروری الفاظ کو خود بخود ہٹا دیتا ہے۔
اس کے علاوہ گزشتہ اگست میں بھی کمپنی نے اسپیچ ٹو ٹیکسٹ کے استعمال کے لیے جیمینائی 3.5 ٹرانسکرائب ماڈل متعارف کرایا تھا، جو اس ٹیکنالوجی کی مسلسل ترقی کا واضح ثبوت ہے۔
