میٹا کی ملکیت میسجنگ ایپ واٹس ایپ نے صارفین کی پرائیویسی کو بہتر بنانے کے لیے نئے فیچرز متعارف کرانے کا اعلان کیا ہے، جن کا مقصد گوگل اور ایپل کی آنے والی اپ ڈیٹس سے پہلے اپنی پوزیشن مضبوط کرنا ہے۔
ویبیٹا انفو کے مطابق ایپل آئی فونز میں اینکرپٹڈ آر سی ایس میسجنگ متعارف کرانے کی تیاری کررہا ہے، جس کے بعد میسجنگ پلیٹ فارمز میں مقابلہ مزید بڑھنے کی توقع ہے۔
یہ بھی پڑھیں: واٹس ایپ کا نیا فیچر: اب نامعلوم نمبرز کے اسٹیٹس بھی دیکھنا ممکن
واٹس ایپ کی جانب سے زیرِ تجربہ ایک اہم فیچر یوزرنیمز کا ہے، جس کے ذریعے صارفین اپنا فون نمبر شیئر کیے بغیر بھی ایک دوسرے سے رابطہ کرسکیں گے۔ اس سے پرائیویسی کی سطح مزید بہتر ہوجائے گی، جیسا کہ ٹیلیگرام اور سگنل جیسے پلیٹ فارمز میں پہلے سے موجود ہے۔
اس کے علاوہ واٹس ایپ میں ‘ویو ونس’ فیچر کو بھی مزید وسعت دی جارہی ہے، جس کے تحت صارفین ایسے پیغامات بھیج سکیں گے جو ایک بار دیکھنے کے بعد خود بخود غائب ہو جائیں گے۔ ایک نئے بیٹا ورژن میں یہ بھی آزمایا جارہا ہے کہ ٹیکسٹ پیغامات بھی کھلنے کے فوراً بعد ختم ہوجائیں۔
اگرچہ واٹس ایپ اینڈ ٹو اینڈ انکرپشن فراہم کرتا ہے، تاہم کلاؤڈ بیک اپ کی سیکیورٹی پر پہلے بھی سوالات اٹھتے رہے ہیں اور بعض ماہرین نے اسے مکمل طور پر محفوظ نہ ہونے پر تنقید کا نشانہ بنایا ہے۔
یہ بھی پڑھیں: واٹس ایپ صارفین کے لیے بڑی سہولت، آن لائن دوستوں کو دیکھنے والا نیا فیچر تیار
ماہرین کے مطابق بڑی ٹیکنالوجی کمپنیاں اب کراس پلیٹ فارم انکرپٹڈ میسجنگ کی طرف تیزی سے بڑھ رہی ہیں، جس کے باعث واٹس ایپ بھی اپنی سروسز میں مسلسل بہتری لارہا ہے تاکہ صارفین کی پرائیویسی اور کنٹرول کو مزید مضبوط بنایا جاسکے۔
