بلوچستان کے دور دراز علاقوں میں معمولی طبی مشورے کے لیے بھی طویل سفر کرنے والے شہریوں کے لیے ڈیجیٹل سہولت متعارف کرا دی گئی۔
یہ بھی پڑھیں: بلوچستان کا نظام صحت ڈیجیٹلائزیشن کی جانب، یونیورسٹی آف اوسلو سے اہم معاہدہ
پی پی ایچ آئی بلوچستان نے وزیراعلیٰ میر سرفراز بگٹی کے وژن کے تحت ’صحت دہلیز‘ ٹیلی ہیلتھ ایپ شروع کردی جس کے ذریعے شہری 24 گھنٹے مستند ڈاکٹروں سے طبی مشاورت حاصل کرسکیں گے۔
صحت دہلیز ایپ کا بنیادی مقصد جدید ڈیجیٹل ٹیکنالوجی کے ذریعے طبی سہولیات کو عوام کی دہلیز تک پہنچانا اور بالخصوص ان علاقوں میں رہنے والے افراد کے لیے ڈاکٹر تک رسائی آسان بنانا ہے جہاں طبی مراکز کی دستیابی یا وہاں تک پہنچنے میں مشکلات کا سامنا کرنا پڑتا ہے۔
پی پی ایچ آئی بلوچستان کے مطابق اس ایپ کے ذریعے شہری گھر بیٹھے ڈاکٹروں سے رابطہ کرکے عام بیماریوں سے متعلق رہنمائی حاصل کرسکیں گے، جبکہ ماؤں اور بچوں کی صحت سے متعلق مشاورت اور مختلف بیماریوں سے بچاؤ کے لیے آگاہی بھی فراہم کی جائے گی۔
مزید پڑھیے: بلوچستان میں جدید ڈیجیٹل طبی نظام متعارف، صحت کی سہولیات بہتر ہونے لگیں
اس ڈیجیٹل سہولت کے ذریعے مریضوں کو ابتدائی طبی رہنمائی کے لیے بار بار شہروں کا رخ کرنے، سفری اخراجات برداشت کرنے اور وقت صرف کرنے کی مشکلات سے کسی حد تک نجات مل سکتی ہے۔ شہری ویب ایپ اور اینڈرائیڈ ایپ تک فراہم کردہ کیو آر کوڈز اسکین کرکے رسائی حاصل کرسکتے ہیں۔
تجزیہ کار کہتے ہیں کہ صحت دہلیز ایپ کا آغاز بلوچستان میں صحت کے شعبے کو ڈیجیٹل بنانے کی جانب ایک اہم قدم ہے لیکن اس کی کامیابی صرف ایپ متعارف کرانے سے نہیں بلکہ اس کے مؤثر استعمال سے مشروط ہوگی۔
صوبے کے متعدد دور دراز علاقوں میں انٹرنیٹ کی محدود دستیابی، اسمارٹ فونز تک رسائی اور ڈیجیٹل آگاہی کی کمی اس سہولت کے استعمال میں رکاوٹ بن سکتی ہے۔
مزید پڑھیں: بچوں کی جسمانی صحت کی بہتری کے لیے بلوچستان میں ہزاروں طلبا کی ہیلتھ اسکرینگ کا آغاز
تجزیہ کاروں کا کہنا ہے کہ اس نظام کو مؤثر بنانے کے لیے ضروری ہے کہ مستند ڈاکٹروں کی مسلسل دستیابی یقینی بنائی جائے، مریضوں کی معلومات کو محفوظ رکھا جائے اور جن مریضوں کو بالمشافہ طبی امداد درکار ہو ان کے لیے قریبی طبی مرکز میں معائنے و علاج کا مناسب انتظام بھی ہو۔
