خیبر پختونخوا کے ضلع شانگلہ میں کھیل کے دوران پہاڑی تودہ گرنے سے کم از کم 10 بچے ملبے تلے دب گئے جن میں سے 8 کی لاشیں نکال لی گئیں ہیں۔ ایک بچی کو زخمی حالت میں اسپتال منتقل کردیا گیا ہے جب کہ ایک بچہ تا حال لاپتا ہے۔
شانگلہ پولیس کے مطابق واقعہ پہاڑی علاقے مارتونگ میں پیش آیا ہے جہاں شام کے وقت بچے کھیل میں مصروف تھے کہ اچانک پہاڑی تودہ ان پر آگرا۔
ریسکیو 1122 نے بھی واقعے کی تصدیق کرتے ہوئے بتایا کہ اطلاع ملتے ہی ریسکیو ٹیموں نے موقع پر پہنچ کر فوراً مدادی کاروائیاں شروع کردی تھیں۔ ترجمان ریسکیو بلال فیضی نے بتایا کہ جائے حادثہ پر مزید ٹیمیں اور مشینری بھی پہنچائی جا رہی ہیں۔
بلال فیضی کا کہنا تھا کہ ’اب تک ملبے کے نیچے سے 8 جسد خاکی نکال لیے گئے ہیں جب کہ مقامی افراد کے مطابق اب بھی ایک بچہ ملبے تلے دبے ہوا ہے جب کہ ایک زخمی بچی کو اسپتال پہنچا دیا گیا ہے‘۔
انہوں نے بتایا کہ باقی بچوں کی تلاش کے لیے سرچ آپریشن جاری ہے اور ریسکیو 1122 کی 3 ایمبولینسز، 22 اہلکار اور ایکسکویٹر آپریشن میں مصروف ہیں۔
ریسکیو ترجمان نے بتایا کہ رات ہونے کے باوجود ریسکیو کا عمل جاری ہے۔ انہوں نے مزید بتایا کہ بچے گراونڈ میں کرکٹ کھیل رہے تھے کہ اچانک پہاڑی تودہ ان پر گر گیا جس سے بچے ملبے تلے دب گئے۔
بلال فیضی نے کہا کہ واقعے کے بعد اہل علاقہ بھی بڑی تعداد میں پہنچ گئے اور امدادی سرگرمیوں میں حصہ لیا۔