مصنوعی ذہانت کی ٹیکنالوجی کی مقبولیت کے ساتھ ہی سوشل میڈیا پر آئے دن ہمیں دلچسپ تصاویر دیکھنے کو ملتی ہیں جو کہ اسی ٹیکنالوجی کی مرہون منت ہوتی ہیں۔ پاکستانی ٹائم لائنز پر کبھی ایلون مسک درزی کے روپ میں دیکھائی دیتے ہیں تو کبھی دنیا کی امیر ترین شخصیات کو کچی آبادی کے مکین کے طور پر دکھایا جاتا ہے۔
اس ٹیکنالوجی کی مدد سے عوام کو یہ تصایر بالکل حقیقت کے قریب لگتی ہیں یہی وجہ ہے کہ صارفین کی جانب سے ان ایڈٹ کی ہوئی تصاویر کو خوب پذیرائی بھی ملتی ہے۔ ایسی ہی ایک تصویر سماجی رابطے کی ویب سائٹ ٹویٹر پر خوب وائرل ہے جس میں ہالی ووڈ اداکار ٹام کروز کو اے آئی ٹیکنالوجی کے ذریعے پاکستان کے شہر ملتان میں دیکھایا گیا ہے۔ ٹام کروز کی تصویر شیئر کرتے ہوئے صارف منیر اسلم لکھتے ہیں ٹام کروز اگر ملتان سے ہوتے۔
Tom Cruise from Multan: pic.twitter.com/pZC2wMUHa8
— Moneir Aslam (@moneir27) July 10, 2023
صارف منیر اسلم کی ٹویٹ وائرل ہوتے ہی پاکستانی ٹائم لائنز پر ہالی ووڈ اداکار ٹام کروز کی تصویر کے حوالے سے تبصروں اور میمز کا ایک طوفان امڈ آیا۔ کسی نے دیسی ٹام کروز کا خطاب دے ڈالا تو کسی صارف کو لگا کہ ٹام کروز اگر پاکستان سے ہوتے تو اور زیادہ ہینڈ سم نظر آتے۔ اس حوالے سے تبصرہ کرتے ہوئے صارف سارہ لکھتی ہیں کہ ٹام کروز اس سے قبل کبھی اتنے ہینڈسم نظر نہیں آئے۔
This man has never looked this handsome ever before! https://t.co/rX5TQXTiTW
— sarah (@Sarah_ali_asif) July 10, 2023
گفتگو مزید آگے بڑھی تو صارفین نے اندازہ لگایا کہ شاید ہالی ووڈ کے مایہ ناز اداکار ٹام کروز ملتان کا مشہور سوہن حلوہ کھانے آئے ہیں تو کسی صارف نے تبصرہ کیا کہ اگر ٹام کروز پاکستان سے ہوتے تو یقیناً ان کو فیئر اینڈ لولی کریم کی ضرورت پڑتی۔ ایک صارف کو ٹام کروز کے فلم ’مشن امپوسبل‘ کے معرکہ آرا کردار اور ملتان کی مشہور سوغات کی مناسبت سے جو تبصرہ سوجھا وہ کچھ یوں تھا: مشن ملتانی سوہن حلوہ ۔
Mission Multani Sohn Halwa!😀
— Naveed Jawed Savul (@NaveedSavul) July 10, 2023
پاکستان میں گرمی کی شدت کا حوالہ دیتے ہوئے صارف لائبہ ملک نے لکھا اس موسم میں اگر ٹام کروز پاکستان آ جائے تو واپسی پر ایسی ہی حالت ہونی ہے۔
اس موسم میں اگر ٹام کروز پاکستان آ جاۓ تو واپسی پر ایسی ہی حالت ہونی ہے😁😂
— Laibamalik (@Ferozan7) July 10, 2023
ایک اور صارف نے لکھا پیپلز پارٹی کو چاہیے کہ وہ ٹام کروز کو ملتان سے آئندہ انتخابات کے لیے پارٹی ٹکٹ دیدے۔
People’s party can give him ticket from Multan…. 🤭😂😆🤣
— Maximus (@SurpriseDay272) July 10, 2023
صارفین جہاں ٹام کروز کی تصویر پر دلچسپ تبصرے کرتے نظر آئے وہی کچھ صارفین اس بات کی کھوج میں بھی سرگرداں رہے کہ آخر اتنے گرم موسم میں ٹام کروز پاکستان کے شمالی علاقہ جات کے بجائے ملتان میں کیا کر رہے ہیں؟ مصنوعی ذہانت کی مرہون منت اس تصویر کے بیشتر تبصرہ نگاروں کے نزدیک صدا بہار ہالی ووڈ اداکار ضرور ملتانی سوہن حلوے کی کھوج میں ہیں۔
