حکومت نے عام انتخابات کے لیے فنڈز کی فراہمی کے معاملات کو حتمی شکل دیتے ہوئے الیکشن کمیشن کو ضرورت کے مطابق مرحلہ وار رقم جاری کرنے کا فیصلہ کرلیا۔
وزارت خزانہ کے ذرائع کے مطابق الیکشن کمیشن کی طرف سے تمام فنڈز یک مشت جاری کرنے کی تجویز ماننے سے انکار کردیا گیا ہے اور اسے فنڈز ضرورت کے مطابق مرحلہ وار جاری کرنے کا فیصلہ کیا گیا ہے۔
ذرائع کے مطابق الیکشن کمیشن ضرورت کے مطابق فنڈز کے لیے وزارت خزانہ سے رجوع کرے گا۔ عام انتخابات کے لیے مجموعی طورپر 42 ارب42 کروڑ روپے فراہم کیے جائیں گے۔ پہلے مرحلے میں 10 ارب روپے جاری ہوں گے جس کی منظوری گزشتہ مالی سال کے دوران دی جاچکی ہے۔
وزارت خزانہ کے ذرائع کے مطابق الیکشن کمیشن کو گزشتہ مالی سال 15 ارب روپے جاری کرنے کی منظوری دی گئی تھی جن میں سے 5 ارب روپے جاری کیے گئے۔ اس طرح گزشتہ مالی سال الیکشن کمیشن نے 5 ارب روپے میں سے 4 ارب47 کروڑ روپے استعمال کیے۔ الیکشن کمیشن نے رہ جانے والے 53 کروڑ روپے واپس وزارت خزانہ کو جمع کروا دیے تھے۔
ذرائع کا کہنا ہے کہ الیکشن کمیشن نےگزشتہ مالی سال عام انتخابات کے لیے 47 ارب 42 کروڑ روپے مانگے تھے۔
