پاکستان پیپلز پارٹی کے چیئرمین اور وزیرِ خارجہ بلاول بھٹو نے کہا ہے خواتین کو برابری کے حقوق دئیے بغیر انسانی حقوق کی پاسداری ناممکن ہے ۔
بلاول ہاوَس سے جاری بیان کے مطابق بلاول بھٹو نے خواتین کے قومی دن پر اپنے پیغام میں کہا آج کا دن پاکستانی خواتین کی جمہوریت کے لیے جدوجہد اور آمریت کی مزاحمت کی علامت کا دن ہے۔
چیئرمین بلاول بھٹو زرداری نے کہا پاکستانی خواتین بے مثال بہادری، عظیم صلاحیتوں اور ناقابلِ تسخیر حوصلے کا استعارہ ہیں۔
انہوں نے کہا کہ مادر ملت فاطمہ جناح، مادرِ جمہوریت بیگم نصرت بھٹو اور شہید بینظیر بھٹو دنیا کے لیے رول ماڈل ہیں۔
انہوں نے کہا کہ میرے لیے یہ باعثِ فخر ہے کہ پاکستان پیپلز پارٹی ملک کی واحد جماعت ہے جس کی قیادت دو خواتین کر چکی ہیں۔
بلاول بھٹو کا کہنا تھا 1973 کا آئین خواتین کو برابری، نمائندگی، تحفظ اور ترقی کے یکساں مواقع کی ضمانت دیتا ہے۔
پی پی پی چیئرمین نے ملک کی خواتین کو یقین دہانی کراتے ہوئے کہا کہ پاکستان پیپلز پارٹی ہر شکل میں موجود امتیاز اور استحصال کے خاتمے کے لئے پاکستانی خواتین کی ہر جدوجہد کی حمایت کرتی ہے۔
انہوں نے پاکستان کی تمام ماؤں، بہنوں اور بیٹیوں سمیت پوری قوم کو مبارکباد بھی پیش کی۔
ایڈیٹر نوٹ : جنرل ضیا الحق کے مارشل لا میں سو سے زائد خواتین نے مال روڈ لاہور پر خواتین کے حقوق کے لیے 12 فروری 1983 کو پہلا مارچ کیا تھا۔ اسی تاریخی دن کے پیش نظر پاکستان میں خواتین کا قومی دن ہر سال 12 فروری کو منایا جاتا ہے ۔
