سابق وزیراعظم اور پاکستان تحریک انصاف ( پی ٹی آئی ) کے چیئرمین عمران خان کی اہلیہ بشریٰ بی بی نے اٹک جیل میں قید اپنے شوہر کی زندگی کو لاحق خطرات سے متعلق محکمہ داخلہ پنجاب کو خط لکھا ہے۔
انہوں نے عمران خان کو جیل میں زہر دینے کے خدشے کا اظہار کیا ہے اور مطالبہ کیا ہے کہ سابق وزیراعظم کو گھر سے بنا ہوا کھانا دینے کی اجازت دی جائے۔
وی نیوز کے پاس دستیاب بشریٰ بی بی کی جانب سے لکھے گئے خط کی کاپی میں عمران خان کو اٹک جیل سے اڈیالہ جیل منتقلی، گھر کا کھانا اور بی کلاس دینے کی درخواست کی گئی ہے۔
سابق خاتون اوّل نے اپنے خط میں لکھا کہ عمران خان کی زندگی کو خطرات لاحق ہیں، ماضی میں قاتلانہ حملہ بھی ہوچکا ہے اور اس کے ذمہ داران کے خلاف قانون نافذ کرنے والے اداروں نے کوئی کارروائی نہیں کی۔ انہوں نے خدشہ ظاہر کیا کہ عمران خان کو جیل میں زہر دیا جا سکتا ہے۔
انہوں نے لکھا کہ عمران خان پاکستان کرکٹ ٹیم کے سابق کپتان، آکسفورڈ یونیورسٹی کے گریجوٹ اور سابق وزیراعظم رہ چکے ہیں اس لیے وہ جیل مینول کے مطابق بی کلاس کیٹیگری کے حقدار ہیں۔
انہوں نے اپنے خط میں لکھا کہ عمران خان کو اڈیالہ جیل کے بجائے اٹک جیل میں رکھا گیا ہے جو کہ قانون کی خلاف ورزی ہے۔ عدالتی فیصلے کے مطابق انہیں اڈیالہ جیل میں رکھنا چاہییے تھا لیکن بغیر کسی قانونی کارروائی کے انہوں اٹک جیل منتقل کیا گیا۔
