خیبرپختونخوا میں پولیس سے ناراض غیرملکی سیاح جوڑے کی قبائلی ضلع خیبر میں پرتکلف مہمان نوازی کی گئی، مہمانوں کے لیے دنبہ ذبح کیا گیا، اس کے علاوہ روایتی کھانے اور تحائف پیش کیے گئے۔
اس موقع پر غیر ملکی سیاحوں کے ساتھ پیش آنے والے واقعے پر ان سے معذرت کی گئی۔
جمرود کے تاریخی بازار میں پولیس سے ناراض ہونے والے غیر ملکی جوڑے کو پولیس اہلکار امین اکبر آفریدی کی رہائش گاہ گودر جمرود میں مدعو کیا گیا۔
سیاحوں کی عزت افزائی کے لیے دنبہ ذبح کیا گیا اور روایتی طریقے سے ان سے معذرت کی گئی، اس موقع پر علاقائی شخصیات کے علاوہ صحافیوں نے بھی شرکت کی۔
اس موقع پر غیر ملکی سیاحوں کو روایتی خوراک وریتہ، لاڑلیے، قہوہ اور پھل پیش کیے گئے۔ جبکہ روایتی موسیقی کا بھی اہتمام کیا گیا تھا جس سے غیرملکی سیاح محظوظ ہوئے۔
غیر ملکی سیاح سالاوا، اولیگ، خاتون سیاح فرنڈم می نے کہاکہ پختون اور خاص کر ضلع خیبر کے عوام نہایت مہمان نواز، محبت کرنے والے اور امن پسند و روایت پسند لوگ ہیں، ہم نے پولیس اہلکاروں کو معاف کر دیا ہے، ہمیں معذرت کا رواج بہت پسند آیا، اب ہمارے دل میں کوئی غم و غصہ نہیں۔
ان کا کہنا تھا کہ اب ہم خوش ہیں، ہم غیر ملکی سیاحوں کو دعوت دیتے ہیں کہ وہ تاریخی مقامات کا دورہ کریں۔
انہوں نے کہاکہ گزشتہ روز پیش آنے والے واقعے میں ہجوم و پوچھ گچھ کے دوران ہمیں پریشانی ہوئی، قبائلی اور خاص کر جمرود کے عوام بہت محبت کرنے والے ہیں جو اب ہمیں محسوس ہوا۔
ان کا کہنا تھا کہ یہاں پر ہمیں تحفے تحائف ملے، جس سے ہم بہت خوش ہیں، اور پولیس اہلکار امین اکبر آفریدی کے شکر گزار ہیں، ہم یہ محبت ہمیشہ یاد رکھیں گے۔
