پاکستان کرکٹ بورڈ کی مینجمنٹ کمیٹی کے چیئرمین کو کراچی سٹیڈیم آمد پر بچوں نے گھیرلیا اور پی ایس ایل میچز مفت دکھانے کی درخواست کی۔ نجم سیٹھی نے بچوں کی فریاد سنتے ہوئے اسی وقت ٹکٹوں کی قیمت میں 50 فیصد رعایت کا اعلان کیا۔
نجم سیٹھی نے اعلان کیا کہ 16 سال سے کم عمر کے طالب علم آدھی قیمت پر ٹکٹس خرید سکتے ہیں اور ساتھ یہ پیشکش بھی کی کہ یہ صرف کراچی کے میچز کے لیے ہے اور صرف طالب علموں کو ہی آدھی قیمت پر ٹکٹس ملیں گے۔ ساتھ آنے والے فیملی ممبرز کو نہیں
انہوں نے بتایا کہ جلد ہی دیگر شہروں کے بچے بھی اس آفر سے لطف اندوز ہو سکیں گے۔
ٹکٹوں کی قیمت کم کرنے کے اعلان کے بعد بچے خوشی سے نہال ہوگئے اور پی سی بی اور نجم سیٹھی کا شکریہ ادا کیا۔
واضح رہے کہ شائقین ویب سائٹ (pcb.bookme.pk) پر جا کر کراچی میں ہونے والے میچز کے آن لائن ٹکٹ بک کر سکتے ہیں۔
اس سے قبل کراچی میں اتوار کے علاوہ پی ایس ایل میچز کے لیے ٹکٹوں کی قیمتیں بالترتیب 2ہزار 900 روپے (وی آئی پی)، ایک ہزار 900 روپے (پریمیم) اور فرسٹ کلاس اور جنرل انکلوژرز کے لیے بالترتیب 950 روپے اور 650 روپے رکھی گئی تھیں
