لاہور ہائیکورٹ میں شہری نے انوکھی درخواست دے دی، جس میں لکھا گیا کہ مجھے کچھ نہیں ہوگا زہر پینے کی اجازت دی جائے، لاہور ہائیکورٹ نے درخواست کو ناقابل سماعت قرار دیکر مسترد کر دیا۔
لاہور کے علاقے مزنگ کے رہائشی سرور تاج نے لاہور ہائیکورٹ میں انوکھی درخواست دائر کی کہ قرآنی آیات پڑھ کر موچی گیٹ پر زہر پینے کا مظاہرہ کرنا چاہتا ہوں جس سے مجھے کچھ نہیں ہوگا لہذا عدالت مجھے یہ تجربہ کرنے کی اجازت دے۔
دوران سماعت جسٹس راحیل کامران نے استفسار کیا کہ آپ زہر کیوں پینا چاہتے ہیں شہری نے عدالت کو بتایا کہ میرے پاس علم ہے میں زہر پیوں گا مجھے کچھ نہیں ہوگا۔
عدالت نے ریمارکس دیے کہ خودکشی تو حرام ہے اور عدالت حرام کام کی کیسے اجازت دے سکتی ہے۔ آپ سستی شہرت کے لیے کوئی اسٹنٹ کھیل رہے ہیں۔
شہری نے موقف اختیار کیا کہ مجھے کوئی شہرت نہیں چاہیے میرا اللہ پر یقین ہے مجھے کچھ نہیں ہوگا، عدالت اجازت دے دے۔
عدالت نے ریمارکس دیے کہ بھارت میں کینسر کے مریضوں نے موت آسان کرنے کے لیے سپریم کورٹ سے رجوع کیا تھا خود موت مانگنے والوں کے حوالے سے بھارتی سپریم کورٹ کے فیصلے موجود ہیں۔
عدالت نے ریمارکس دیے کہ ہم کسی غیر قانونی کام کی اجازت نہیں دے سکتےآپ کا اگر زیادہ دل ہے تو کریں پھر قانون کے مطابق آپکے خلاف جو کارروائی ہوگی وہ ہوجائے گی۔
جس کے بعد عدالت نے درخواست ناقابل سماعت قرار دیکر مسترد کر دی۔
